Taiwani yatangaje ko ku Cyumweru u Bushinwa bwohereje indege z’intambara zirimo izitagira abapilote mu bikorwa by’irondo ryo kuzenguruka icyo kirwa mu rwego rwo kwitegura ko igihe icyo ari cyo cyose hashobora kuvuka intambara .

Sponsored Ad

Ni mu gihe ku ruhande rwabwo u Bushinwa bwamaganye icyemezo cya Leta Zunze Ubumwe za Amerika cyo kugurisha intwaro Taiwani.

Ministeri y’ububanyi n’amahanga ya Leta Zunze Ubumwe za Amerika kuwa Gatanu, itariki 25 Ukwakira yemeye kugurisha intwaro zifite agaciro ka miliyari ebyiri z’Amadolari ya Amerika kuri Taiwani.

Muri izo ntwaro harimo misile zirasirwa ku butaka zigamije intego ziri mu kirere na za radari zigenzura ikirere. Hategerejwe ko Inteko Ishinga Amategeko ya Amerika ibyemeza mbere y’uko Taiwani ibona izi ntwaro nk’uko iyi nkuru dukesha VOA ivuga.

Kuri Iki Cyumweru, itariki 27 Ukwakira 2024, Ministeri y’ingabo ya Taiwani yatangaje ko yabonye Indege z’intambara z’u Bushinwa zigera kuri 19 harimo n’izitagira abapilote zazengurukaga icyo kirwa mu gihe cy’amasaha ane mu gihe ku rundi ruhande hari amato y’intambara arekereje mu nyanja.