Polise yo muri Leta ya Ioma, muri Leta Zunze Ubuwe za america, yatangaje ko abantu batandatu bishwe muri iyo leta nyuma y‘uruhererekane rw‘amasasu rwaturutse ku makimbirane yo mu muryango

Umugabo ukekwaho kurasa abo bantu na we yasanzwe yapfuye nyuma yo kwiyahura yirasa, nk’uko Polisi yo mu mujyi wa Muscatine muri Iowa yabitangaje.
Nk’uko polisi ibivuga, bikekwa ko abishwe ari abo mu muryango w’uwo ukekwaho kubarasa, witwa Ryan Willis McFarland w’imyaka 52, wari utuye i Muscatine.

Umukuru wa Polisi ya Muscatine, Anthony Kies, yavuze ko uruhererekane rw’ubwo bwicanyi bwabereye ahantu hatandukanye ku wa Mbere ari "igikorwa cy’ubugome gikomeye."
Abapolisi bahawe amakuru ko hari amasasu yarashwe ku wa Mbere nyuma gato ya saa sita. Bageze mu nzu imwe, basanzemo abantu bane barashwe. Byahise byemezwa ko bose bari bamaze gupfa.
McFarland yari yamaze kuva muri iyo nzu mbere y’uko abapolisi bahagera. Ariko nyuma y’igihe gito, bamusanze ku muhanda uri hafi y’uruzi, hafi y’ikiraro cy’abanyamaguru.

Polisi yavuze ko yari yirashwe, kandi ko bagerageje kumuha ubutabazi bw’ibanze, ariko nyuma biza kwemezwa ko yapfiriye aho bamusanze.
Nyuma yaho, abashinzwe iperereza basanze undi mugabo yapfiriye mu yindi nzu, na we bikekwa ko yari yarashwe.

Bakomeje iperereza, bagera no ku nyubako y’ubucuruzi, aho basanze undi muntu wapfuye, na we bikekwa ko yarashwe.
Mu itangazo ryayo, polisi yagize iti:"Ibimenyetso bya mbere bigaragaza ko uru ruhererekane rw’amasasu rwatewe n’amakimbirane yo mu muryango."
Yongeye iti:"Abantu bose bishwe bikekwa ko bari abo mu muryango w’uwapfuye ukekwaho kubarasa."
Anthony Kies ntiyatangaje amazina cyangwa imyaka y’abishwe, ariko yavuze ko iperereza rikomeje.