Umujyanama Mukuru wa Perezida wa Leta Zunze Ubumwe za Amerika mu bufatanye na Afurika, Massad Boulos, yasabye ubutegetsi bwa Repubulika Iharanira Demokarasi ya Congo kubahiriza agahenge nk’uko bwabyemeye ku wa 13 Gashyantare 2026.

Ibiro bya Perezida wa RDC byatangaje ko Félix Tshisekedi yemeye agahenge kasabwe na Perezida wa Angola akaba n’Umuyobozi w’Umuryango wa Afurika Yunze Ubumwe (AU) biteganyijwe ko kazatangira kubahirizwa tariki ya 18 Gashyantare.

Byasobanuye ko nubwo Tshisekedi yemeye agahenge, atazemera ko AFC/M23 igerageza ibikorwa byo kwagura ibirindiro, kongerera imbaraga abarwanyi bari mu bice biberamo urugamba, no “kwakira ubufasha buva mu mahanga”.

Umuyobozi wa AFC/M23, Corneille Nangaa, yatangaje ko nubwo Leta ya RDC yatangaje ko yemeye agahenge kasabwe na Angola, ikomeje kugaba ibitero ku basivili no ku birindiro by’iri huriro, ashimangira ko iri tangazo rigamije kubeshya umuryango mpuzamahanga.

AFC/M23 yagaragaje ko nubwo Leta ya Angola itayitumiye mu biganiro byabanjirije itangazo ry’icyifuzo cy’agahenge, ntinamenyeshwe ibikubiyemo, isanzwe ishyigikiye gahunda y’amahoro kandi ko izakomeza kubahiriza agahenge gashingiye kuri gahunda ya Doha muri Qatar.

Boulos yagaragaje ko yishimiye itangazo rya Leta ya RDC ryo kwemera agahenge, ashimangira ariko ko kadakwiye kugarukira mu nyandiko, ahubwo ko kagomba no kubahirizwa, ibitero birimo ibya drone bigahagara.

Yagize ati “Natewe imbaraga no kwemera kwa RDC icyifuzo cya Angola cy’agahenge. Ibi bigomba kujyana n’ibikorwa. Impande zose zigomba guhagarika imirwano aka kanya, zirimo ibitero bya drones bikomeje gutwara ubuzima bw’abasivili b’inzirakarengane.”

Leta ya Angola yasabye ko habaho agahenge gashya mu gihe ingabo ziri mu butumwa bw’amahoro bw’Umuryango w’Abibumbye muri RDC (MONUSCO) zitegura gutangira kubahiriza akandi kemerejwe mu biganiro bya Doha, by’umwihariko muri teritwari ya Uvira.