Perezida Donald Trump yavuze ko Leta Zunze Ubumwe za Amerika igiye gufata ingamba zikarishye cyane kuri Iran kubera ihohoterwa ikomeje gukorera abigaragambya.

Ni nyuma y’uko amashyirahamwe ashinzwe uburenganzira bwa muntu muri iki gihugu atangaje ko abigaragambya barenga 2.400 batavuga rumwe na leta bishwe.

Trump yabwiye CBS News, ati: “Niba babamanitse, bazabona ibintu bikomeye… Tuzafata ingamba zikomeye cyane nibaramuka bakoze icyo gikorwa.”

Umwe mu bayobozi bo muri Iran yabwiye Reuters ko abantu 2.000 ari bo bamaze kwicwa, ariko avuga ko abakora ibikorwa by’iterabwoba ari bo babigizemo uruhare.

Trump aherutse kuvuga ko ateganya gukoresha inama yo kuganira ku bibazo bya Iran, yemeza ko ashaka kumenya umubare wa nyawo w’abamaze gupfira mu myigaragambyo.

Yagize ati: “Ubwicanyi burasa nk’ubukomeye, ariko ntiturabimenya neza. Abapfiriye mu myigaragambyo nibamara kumenyekana, tuzafata ingamba zikwiye.”

Amakuru avuga ko abigaragambya 2.403 ari bo bamaze kwicwa harimo n’abana 12, ndetse abandi bantu 150 bafitanye isano n’ubutegetsi na bo bamaze kwicwa.

Ku wa Kabiri, Trump yanditse kuri Truth Social ko ubutegetsi bwa Iran buzishyura igiciro gikomeye ku bw’iyicwa ry’abigaragambya, asaba abaturage gukomeza kwigaragambya.

Ati: “Nta nama n’imwe nzongera kugira abategetsi ba Iran kugeza igihe ubwo bwicanyi budafite ishingiro buhagaritswe. Ubufasha buri mu nzira!”

Imyigaragambyo muri Iran, bivugwa ko imaze kugera mu mijyi 180 mu ntara 31, yatangiye kubera uburakari bwatewe no guta agaciro kw’ifaranga muri iki gihugu no kwiyongera kw’ibiciro.