Ubushinjacyaha bwa Bangladesh bwashinje Sheikh Hasina wabaye Minisitiri w’Intebe kwica abantu 1400, busaba urukiko kumukatira igihano cy’urupfu.

Hasina yabaye Minisitiri w’Intebe kuva mu 1996 kugeza mu 2001 no kuva mu 2009 kugeza mu 2024 ubwo yakurwagaho n’imyigaragambyo ikomeye yari yiganjemo abanyeshuri.

Nyuma y’iyi myigaragambyo, hasohotse ijwi rya Hasina, yumvikana abwira abashinzwe umutekano ko bagomba kurasa abigaragambya bakoresheje intwaro zica.

Umushinjacyaha Mukuru, Tajul Islam, ku wa 16 Ukwakira 2025 yabwiye urukiko ko Hasina yari afite intego yo kuguma ku butegetsi burundu, hamwe n’umuryango we, kandi ko kugira ngo bimushobokere, yahisemo kuba umunyabyaha.

Kuri Tajul, Hasina yakabaye akatirwa ibihano by’urupfu 1400 bihwanye n’abantu 1400 yicishije, ariko kubera ho bidashoboka, akwiye kwicwa. Ati: “Turasaba byibura kimwe.”

Imyigaragambyo yo muri Bangladesh yatangiye muri Nyakanga 2024. Icyo gihe abaturage basabaga Leta gukuraho itegeko rigenera umubare w’imirimo abakomoka ku barwanye urugamba rwo kwibohora rwabaye mu 1971.

Kubera ko Hasina yanze kubumva, agaha abashinzwe umutekano ibwiriza ryo kubarwanya, intego y’imyigaragambyo yarahindutse, bamusaba kwegura ariko na we yanga kuva ku izima.

Tariki ya 5 Kanama, abigaragambya basatiriye urugo rwa Hasina ruherereye mu mujyi wa Dhaka, ahunga yifashishije kajugujugu. Mu gihe ari mu buhungiro mu Buhinde, ntiyemera ibi byaha.