Leta ya Burkina Faso yatangaje ko yataye muri yombi abasirikare 11 ba Burkina Faso bavogereye ikirere cyayo, ifatira n’indege y’intambara bari barimo.

Ingabo za Burkina Faso zabonye indege y’ubwikorezi ya Nigeria yo mu bwoko bwa C-130 iri mu kirere cyayo itabiherewe uburenganzira, zitegeka umupilote wayo kuyigusha hasi.

Leta ya Burkina Faso yasobanuye ko iyi ndege ikimara kugwa hasi, abasirikare 11 barimo abapilote bahise bafatwa, barafungwa, bazira kuvogera ikirere cy’igihugu.

Bivugwa ko iyi ndege yajyaga muri Benin gutanga ubufasha mu gikorwa cyo kuburizamo ihirikwa ry’ubutegetsi bwa Perezida Patrice Talon cyageragejwe tariki ya 7 Ukuboza 2025.

Umuryango AES uhuza Burkina Faso, Mali na Niger, watangaje ko indege yose izinjira mu kirere cy’ibi bihugu itabiherewe uburenganzira, izahanurwa.

AES yagize iti: “Indege idafite uruhushya izagerageza kwinjira mu kirere cyacu izahanurwa. AES irashimangira ko yitegura kurinda ubusugire n’ubwigenge. Harakabaho Afurika yigenga.”

Leta ya Nigeria idacana uwaka n’ibihugu byo muri AES kuko itemera abayobozi b’ibihugu biyigize, iri gukoresha inzira ya dipolomasi kugira ngo aba basirikare bafungurwe, indege barimo na yo irekurwe.