Urukiko rushinzwe kurinda Itegeko Nshinga muri Repubulika ya Centrafrique rwemeje intsinzi ya Faustin-Archange Touadéra mu matora y’Umukuru w’Igihugu yabaye mu kwezi gushize.

Aya matora yabaye tariki ya 28 Ukuboza 2025, ahurirana n’ay’abagize Inteko Ishinga Amategeko n’ay’inzego z’ibanze. Komisiyo y’amatora yemeje ko yitabiriwe n’abantu 52,42% mu barenga miliyoni 2,3 bari kuri lisite y’itora.

Mu byumweru bibiri bishize, iyi komisiyo yemeje ko Touadera yatsinze ku majwi 76,15%, ahigitse abandi bakandida barindwi bari bahatanye. Anicet-Georges Dologuélé wagize amajwi 13,5% yasabye urukiko gutesha agaciro ibyavuye mu matora, asobanura ko yibwe.

Kubera ko ibyavuye mu matora byatangajwe n’iyi komisiyo byari iby’agateganyo, ku wa 19 Mutarama 2026 urukiko rwagaragaje ko amajwi ya Touadéra yageze kuri 77,9%, rutesha agaciro icyifuzo cya Dologuélé.

Perezida Touadéra ayobora Repubulika ya Centrafrique kuva mu 2016. Yemerewe guhatanira manda ya gatatu nyuma y’aho Itegeko Nshinga ry’iki gihugugu rivuguruwe mu 2023.

Urukiko rumaze kwemeza intsinzi ye, uyu Mukuru w’Igihugu yabwiye abanyamakuru ko azakomeza kubaka amahoro, umutekano n’imibanire myiza muri iki gihugu, anafashe abaturage kubona ibyangombwa nkenerwa.

Uyu Mukuru w’Igihugu yagaragaje ko nubwo hari intambwe ikomeye ubutegetsi bwe bwateye muri izi nzego, hakiri icyuho agomba kuziba muri manda ya gatatu.

Bidasubirwaho, Perezida Touadéra ni we watsinze amatora y’Umukuru w’Igihugu muri Centrafrique