Ingendo z’indege zitwara abagenzi hagati y’Umurwa Mukuru wa Ethiopia, Addis Ababa, n’imijyi yo mu majyaruguru y’Intara ya Tigray zahagaritswe, hakekwa ko imirwano yaba igiye kubura hagati y’Ingabo za Leta n’abarwanyi ba TPLF (Tigray People’s Liberation Front).

Ethiopian Airlines, ikora ingendo zose muri iki gihugu, yoherereje abagenzi ubutumwa bugufi ibamenyesha ko ingendo zahagaritswe kubera impamvu zibatunguye.

Icyakora haba Ethiopian Airlines na Guverinoma ya Ethiopia nta rwego ruragira icyo rutangaza kuri iki kibazo.

Umuyobozi ushinzwe ubwikorezi muri Tigray, Tadele Mengistu yabwiye BBC ko ingendo zo mu kirere zahagaritswe atangaza ko nta makuru ahagije afite ku cyabiteye. Icyakora bisi zo ziracyagenda hagati ya Addis Ababa na Tigray.

Umunyamakuru wa BBC muri Mekelle iri mu mijyi ikomeye muri Tigray, yemeje aya makuru yahawe n’abakozi b’ikibuga cy’indege, babwiwe ko batagomba kujya ku kazi.

Amasezerano y’amahoro yashyizweho umukono mu 2022 yo guhagarika intambara ikomeye muri Tigray ntabwo ari kubahirizwa.

Ibibazo by’ubutaka n’amatora ategerejwe muri Kamena 2026 birimo kongera umwuka mubi hagati y’abaturage ba Ethiopia.

Hari amakuru avuga ko habaye imirwano hagati y’ingabo za Leta n’abarwanyi bo muri Tigray mu gace Mai Degusha.

Ni amakimbirane yatewe n’uko abo mu gace ka Amhara bigabije ubutaka bwera bwo mu Burengerazuba bwa Tigray.

Leta ivuga ko iki kibazo kizakemurwa binyuze mu matora ya kamarampaka. Icyakora abantu bagera ku miliyoni imwe bahunze ako gace ku buryo bitazwi niba bazashobora gutora.

Umuryango wa Afurika Yunze Ubumwe ni wo wahuje Guverinoma ya Ethiopia n’Umutwe wa TPLF mu masezerano ya Pretoria, ibyatumye hashyirwaho ubuyobozi bw’agateganyo mu kuyobora Tigray.

TPLF yahoze ari ishyaka riyoboye politiki ya Ethiopia mu myaka isaga 20 ishize, ibintu bihinduka ubwo Abiy Ahmed yajyaga ku butegetsi mu 2018, ashyiraho ishyaka rishya, abayobozi ba TPLF banga kuryiyungaho, kutumvikana bitangira ubwo.

Mu Ugushyingo 2020 haje kuvuka itambara hagati ya TPLF n’Ingabo za Leta yangije byinshi, aho AU igaragaza ko iyi ntambara yaguyemo abarenga ibihumbi 600.