Igisirikare cya Repubulika Iharanira Demokarasi ya Congo (FARDC) cyatangaje ko urugamba cyatangije muri iki cyumweru rugamije kwisubiza ibice byo mu Ntara ya Kivu y’Amajyepfo birimo Umujyi wa Uvira.

Tariki ya 24 Ukuboza 2025, iki gisirikare cyifatanyije n’ihuriro ry’imitwe ya Wazalendo byagabye ibitero bikomeye ku birindiro bya AFC/M23 muri Santere ya Makobola iri muri teritwari ya Fizi, byifashishije indege z’intambara, drones n’intwaro ziremereye.

Ku gicamunsi cya Noheli, abarwanyi ba AFC/M23 bavuye muri iyi Santere bari bamazemo ibyumweru bibiri, berekeza mu bice byo mu Majyaruguru. Nta mirwano yabaye kuri uwo munsi mukuru nubwo Wazalendo bigambye intsinzi.

Tariki ya 26 Ukuboza, Ingabo za RDC ziriwe zigaba ibitero ku birindiro bya AFC/M23 muri teritwari ya Uvira. Drones zazo zarashe ku cyambu cya Kalundu giherereye mu nkengero z’umujyi wa Uvira ku Kiyaga cya Tanganyika.

Umuvugizi w’Igisirikare cya RDC, Gen Maj Sylvain Ekenge Bomusa, tariki ya 27 Ukuboza yatangaje ko kiri kugenzura Makobola 1 na Makobola 2, imirwano ikaba ikomereje mu duce turi mu bilometero birindwi ugana mu mujyi wa Uvira.

Gen Maj Ekenge yagize ati “Uyu munsi, igisirikare cya RDC ni cyo kiri kugenzura Makobola 1 na Makobola 2 yose. Kuva mu gitondo, imirwano iri kubera mu duce twa Katongo na Kabimba, mu bilometero bigera kuri birindwi ujya mu mujyi wa Uvira.”

AFC/M23 yinjiye mu mujyi wa Uvira tariki ya 9 Ukuboza, iwuvamo ku ya 17 n’iya 18 Ukuboza. Yasobanuye ko yafashe iki cyemezo mu rwego rwo kubaka icyizere mu biganiro biyihuza na Leta ya RDC kugira ngo bigende neza.

Ubuyobozi bwa AFC/M23 bwatangaje ko ihuriro ry’ingabo za Leta ya RDC zitagomba gusubira muri uyu mujyi, ahubwo ko ukwiye kwigenzurirwa n’abasivili cyangwa se ukoherezwamo ingabo zitagira uruhande zibogamiyeho.

Abarwanyi ba AFC/M23 bagumye mu bice bikikije umujyi wa Uvira, mu majyepfo nka Makobola, mu majyaruguru yawo no mu misozi iri mu burengerazuba. Byababaje Leta ya RDC, ivuga ko batigeze bava muri uyu mujyi.

Bisa n’aho ingabo za RDC na Wazalendo bishaka gusunikira abarwanyi ba AFC/M23 mu mujyi wa Uvira; bikabishingiraho bigaragariza abahuza barimo Leta Zunze Ubumwe za Amerika na Qatar ko ari ikimenyetso cy’uko batigeze bawuvamo.

Aho ni ho ingabo za RDC zishobora guhera zigaba ibitero bikomeye ku barwanyi ba AFC/M23 mu mujyi wa Uvira nk’uko zabigenje muri Makobola tariki ya 24 Ukuboza, bawuvamo zigatangaza ko zawisubije zikoresheje imbaraga.

Gen Maj Sylvain Ekenge yatangaje ko FARDC iri gusatira Umujyi wa Uvira