Urwego rushinzwe Iperereza muri Leta Zunze Ubumwe za Amerika (FBI), rwirukanye abakozi barwo bagera kuri 20 bafotowe mu 2020 bari mu nkundura ya ’Black lives Matter’ nyuma y’urupfu rw’umwirabura George Floyd.

George Floyd ni umwirabura wishwe mu 2020 n’umupolisi w’umuzungu witwa Derek Chauvin amushinze ivi mu ijoshi yamuzirikiye amaboko inyuma ku mugongo kugeza ashizemo umwuka.
Urupfu rwa George Floyd rwazamuye inkubiri ya ‘Black Lives Matter’, byatumye abantu batandukanye bifatanya n’abirabura aho bakora ikimenyetso cyo gupfukama nko guha agaciro ubuzima bw’abirabura nk’uko iyo mvugo ibivuga.
Mu 2020 mu bagaragaye bakora icyo kimenyetso harimo n’abakozi ba FBI bari banambaye impuzankano zayo. Abo ni bo bivugwa ko birukanwe, aho bari hagati ya 15 na 20 biganjemo abahoze mu gisirikare bashinjwe kwica amahame FBI igenderaho.
Ubwo habaga imyigaragambyo mu 2020 yo kwamagana ihohoterwa rikorerwa abirabura muri Washington, umufotozi yafotoye abakozi ba FBI na bo bapfukamye ku muhanda, bagashinjwa kwivanga mu bya politiki.
Ihuriro ry’Abakozi ba FBI (FBI Agents Association) ryamaganye kwirukanwa kwa bagenzi babo rivuga ko binyuranyije n’amategeko kandi byishe uburenganzira bw’abakozi ba Leta n’amategeko agenga uburyo abantu birukanwamo.
Ryasabye Inteko Ishinga Amategeko gukora iperereza ku cyemezo cyafashwe n’Umuyobozi wa FBI, Kash Patel.
Abasesengura ibya Politiki bavuga ko kuva Kash Patel ufatwa nk’inshuti y’akadasohoka ya Perezida Donald Trump yagera ku buyobozi bwa FBI yakunze gufata ibyemezo byo kwirukana abakozi mu buryo butavugwaho rumwe, bakamushinja gukorera mu kwaha kwa Trump.
Kash Patel yakunze kwamagana ibyo bimuvugwaho ashimangira ko umukozi udashobora kubahiriza amahame agenga FBI adakwiye gukomeza kuba mu nshingano.

FBI yirukanye abakozi bayo bafotowe bari mu nkundura ya Black Lives matter