Général Christian Tshiwewe Songesha, wahoze ari Umugaba Mukuru w’Ingabo za RDC, yoherejwe gufungirwa muri gereza ya gisirikare ya Ndolo.

Gen. Tshiwewe, yafashwe ari umujyanama wa Perezida Félix Tshisekedi wa RDC mu by’igisirikare, yoherejwe muri iyo gereza kuri uyu wa 14 Mutarama 2026.

Uyu Jenerali, wari inshuti magara ya Tshisekedi, yafatanywe n’itsinda rigari ry’abasirikare bakuru bafashwe mu mezi ashize, bakekwaho ibyaha birimo gushaka kwivugana Perezida.

Babanje gufungirwa muri kasho y’Inama Nkuru y’Igihugu ishinzwe umutekano, mu gihe bakorwagaho iperereza.

Ibyaha bashinjwa birimo umugambi wo kugirira nabi Umukuru w’Igihugu, kugambanira igihugu binyuze mu guha amakuru y’ubutasi ku banyamahanga, kugerageza kwica no gukwirakwiza ibihuha.

Ku wa 7 Mutarama 2026, Gen. Franck Ntumba Buamunda, wahoze ari umuyobozi w’ibiro bishinzwe igisirikare mu ngoro ya Perezida wa RDC, yajyanywe muri gereza ya gisirikare ya Ndolo.

Kuri uwo munsi, hoherejwe kandi Gen. Maj. Christian Ndaywel Okura, wayoboye urwego rw’ubutasi bwa gisirikare.

Ni mu gihe abarimo Brig. Gen. Benjamin Katende Batubadila, Brig. Gen. Antoine Longondjo Lobandi, Col. Jules Boele Bagolome na Maj. Jean-Lambert Embole Ngondili nabo baraye bwa mbere muri iyo gereza.

Amakuru dukesha UMUSEKE avuga ko Gen. Christian Tshiwewe Songesha, wari umwizerwa wa Tshisekedi, nawe yakuwe aho yari amaze iminsi afungiwe asanga bagenzi be muri gereza ya Ndolo irinzwe cyane.

Gen. Tshiwewe, ushinjwa gushaka kwica Perezida Tshisekedi, Umunyamabanga Mukuru w’ishyaka UDPS riri ku butegetsi, Augustin Kabuya, aherutse kwemeza ko uyu musirikare yemera icyaha.

Kugeza ubu, FARDC imaze guta muri yombi abajenerali 11 n’abasirikare bakuru 14, bafashwe bashinjwa ibi byaha, kandi mu minsi ya vuba bagezwe imbere y’urukiko rwa gisirikare.