Umuhuzabikorwa w’Ihuriro Alliance Fleuve Congo (AFC), Corneille Nangaa, yatangaje ko urugamba rwo kurwanya ubutegetsi bwa RDC iri huriro ririmo rudateze guhungabanywa n’ibihano ryafatiwe na Leta Zunze Ubumwe za Amerika.

Sponsored Ad

Ku wa Kane tariki ya 25 Nyakanga Amerika yatangaje ko yafatiye ibihano AFC n’abayobozi bayo barimo Nangaa, Bertrand Bisimwa na Charles Sematama.

Ni ibihano kandi byahuriranye n’urubanza Nangaa na bamwe mu byegera bye baburanishwamo n’ubutabera bwa gisirikare bwa RDC bubarega ibyaha birimo iby’intambara no kujya mu mutwe utemewe.

Nangaa mu butumwa yanyujije ku rubuga rwe rwa X yahoze yitwa Twitter, yashimangiye ko "nta bihano bitemewe cyangwa imanza zidafite ishingiro zizaduhungabanya mu rugamba rwiza turimo rwo kuzahura igihugu".

Yakomeje agira ati: "Nk’abanye-Congo nta kintu na kimwe kizadukumira muri uru rugamba rwiza rwubahirije itegekonshinga rugamije kubohora abaturage ba Congo, hashingiwe ku ngingo ya 64 y’itegekonshinga ryacu. Ni uburenganzira bwacu nk’abanye-Congo".

Uyu mugabo wahoze ari Perezida wa Komisiyo y’amatora muri RDC, yavuze ko AFC yiteguye gukomeza urugamba rwayo rwo gukuraho ubutegetsi bw’igitugu bwa Perezida Félix Tshisekedi ashinja kuba amaze igihe amena amaraso y’abanye-Congo.

Yongeyeho ko Isi yose izi akajagari karanze amatora y’Umukuru yabaye muri RDC mu Ukuboza 2023, ndetse n’ibibazo birimo itonesha, ipfobya, kunyereza umutungo w’igihugu ndetse n’ubwicanyi byayakurikiye.

Ni ibibazo ashimangira ko bihungabanya cyane imibereho n’ubukungu by’abaturage ba Congo.

Nangaa kandi yabwiye abanyamerika ko kuba bafatiye AFC ibihano ntaho bataniye n’abasokuruza babo avuga ko bishe Patrice Lumumba bamuhora kubungabunga inyungu za Congo.

Uyu mugabo kandi yavuze ko bibabaje kubona Amerika nk’igihugu cy’umuhuza cyiyemeje gutanga umusanzu mu gukemura amakimbirane yo muri RDC, yirengagiza inshingano yafashe yo guharanira amahoro n’umutekano.