Ibisasu bibiri bikomeye byaturikiye mu murwa mukuru wa Syria, Damas, nyuma y’amasaha make Perezida w’Ubufaransa, Emmanuel Macron, ageze muri icyo gihugu mu ruzinduko rw’iminsi ibiri. Ibyo biturika byabereye hafi ya hoteri yari acumbitsemo, bituma havuka impungenge ku mutekano we n’uw’abari bamuherekeje.

Ababonye ibyabaye bavuga ko babonye umwotsi mwinshi uzamuka mu kirere, mu gihe imodoka zitwara indembe zahise zihutira kugera aho ibisasu byaturikiye.

Nubwo ayo makuru yari amaze gukwirakwira, televiziyo y’igihugu cya Syria, Syrian TV, yatangaje ko Perezida wa Syria, Ahmed al-Sharaa, yari amaze kwakira Perezida Macron ku biro by’umukuru w’igihugu.

Abashinzwe umutekano mu Bufaransa batangaje ko Perezida Macron nta kibazo yagize. Bavuze ko ibyo bisasu byari byashyizwe mu kimoteri no muri bisi itarimo abantu, kandi ko byaturitse nyuma y’uko Perezida Macron n’itsinda bari kumwe bavuye ku ihoteri berekeza ku biro by’umukuru w’igihugu.

Amakuru atangwa n’inzego z’umutekano agaragaza ko abantu benshi, barimo n’abapolisi, bakomerekeye muri ibyo biturika, nubwo umubare nyawo wabo utaratangazwa.

Guverinoma y’Ubufaransa yavuze ko uru ruzinduko rukomeje nk’uko rwari rwateguwe, ndetse ko nta mpinduka zabaye kuri gahunda ya Perezida Macron.

Ibi bibaye hashize icyumweru kimwe gusa ikindi gisasu giturikiye i Damas kigahitana abantu icyenda, bikomeza kugaragaza ko umutekano muri Syria ugihangayikishije.

Perezida Emmanuel Macron ni we muyobozi wa mbere ukomeye wo mu bihugu by’Uburengerazuba usuye Syria kuva ubutegetsi bw’umuryango wa Assad family buhiritswe mu mwaka wa 2024.

Uru ruzinduko rufite uburemere bwihariye, kuko Ubufaransa bwigeze kuyobora Syria mu gihe cy’ubutegetsi bwahawe n’icyahoze cyitwa League of Nations, hagati y’Intambara ya Mbere n’intambara ya Kabiri y’isi Yose.