Indege ya Gisirikare yo muri Leta Zunze Ubumwe za Amerika yo mu bwoko bwa Navy F-35 yahiriye mu kirere hafi y’ikibuga cy’indege cya Naval Air Station Lemoore giherereye muri California.

Iyi ndege yahiye ku wa 30 Nyakanga 2025. Ishami rya gisirikare rishinzwe imirwano yo mu mazi no mu kirere, Navy, ryatangaje ko umupilote yabashije kuvamo amahoro.

Ryagize riti “Umupilote yabashije kuyivamo amahoro ndetse nta n’undi muntu wagize icyo aba.”

Ubu buyobozi bwabwiye CNN ko iyi ndege yari mu ndege z’intambara zitoza abapilote ibijyanye n’intambara zo mu kirere.

Indege yahiye yari imwe mu zakoreshwaga zo mu bwoko bwa F-35, aho yo yari F-35C yari izwiho guhagurukira ahantu hato ndetse no kubasha kugwa ku bwato butwara indege ‘air carrier’.

Kugeza ubu icyateye iyo mpanuka ntikiramenyekana gusa iperereza riracyakomeje.