Ihuriro ry’ingabo za Repubulika Iharanira Demokarasi ya Congo ryatsinzwe urugamba rihanganyemo na AFC/M23 rwakomeje kubera mu ntara ya Kivu y’Amajyepfo kuri uyu wa 4 Ukuboza 2025, riva muri bimwe mu bice ryagenzuraga.

Ibice byo muri iyi ntara birimo Katogota, Luvungi na Lubarika muri teritwari ya Uvira na sheferi ya Kaziba muri Walungu bimaze iminsi itatu biberamo imirwano ikomeye ihanganishije iri huriro na AFC/M23.

Ingabo za RDC, iz’u Burundi na Wazalendo byarashe ibisasu biremereye muri santere ya Kamanyola, hafi y’umupaka uhuza ibihugu bitatu, ndetse no muri Kaziba.

Muri teritwari ya Kabare, Wazalendo baturutse mu misozi ya Kajeje binjiye mu duce dutandukanye two muri santere ya Mudaka, barasa amasasu menshi mu rwego rwo guca igikuba mu baturage.

Wazalendo bishe abaturage babiri bo muri Mudaka, bakomeretsa abarimo abanyeshuri batatu biga mu ishuri ryisumbuye ryo muri iyi santere.

Bahagaritse ibikorwa by’abaturage birimo ubucuruzi, bafunga umuhanda umuhanda uhuza iyi santere n’ibindi bice birimo Bukavu, imodoka zanyuragamo zimara amasaha menshi zabuze aho zinyura.

Abarwanyi ba AFC/M23 baturutse i Bukavu bageze muri santere ya Mudaka, birukana Wazalendo, banafungura umuhanda wari wafunzwe.

Umuvugizi wa AFC/M23, Lawrence Kanyuka, yagize ati: "Kuri uyu wa Kane, tariki ya 4 Ukuboza 2025, saa tatu z’igitondo, muri Mudaka muri Kivu y’Amajyepfo, izi ngabo zarashe ishuri, ziteza impfu n’inkomere zirimo abanyeshuri b’inzirakarengane ubwo bari mu masomo.”

Ku gicamunsi kandi, abarwanyi ba AFC/M23 bakuye ingabo za RDC na Wazalendo mu misozi barimo ubwo bagabaga ibitero mu bice bya Kaziba, irimo Butuzi, Chemba, Nabumbu, Mwera na Nabumbu.

Nk’uko byagenze mu minsi ibiri ishize, ibisasu byarashwe mu duce twa Kaziba, nka Kasheke, Kasigalire na Kashozi, byasenye inzu z’abaturage n’ibikorwaremezo, abaturage bahasiga ubuzima, abandi barakomereka.

Ihuriro ry’ingabo za Leta ya RDC ryagerageje gukura AFC/M23 muri Kamanyola, ryifashishije intwaro ziremereye nka BM-Grad, indege ya Sukhoi-25 na drones z’intambara, ariko ntacyo byatanze kuko iracyahagenzura.

Icyakoze bamwe mu baturage ba Kamanyola bo bagize ubwoba, cyane ko hari bagenzi babo bishwe n’ibisasu. Ababarirwa mu magana bafashe icyemezo cyo guhungira mu Rwanda no mu bindi bice byo muri RDC bizera ko bitekanye.