Ingabo za Repubulika Iharanira Demokarasi ya Congo zagabye igitero cy’indege y’intambara ya Sukhoi hafi y’inkambi yahungiyemo Abanyamulenge ya Mikenke na Rwitsankuku mu Ntara ya Kivu y’Amajyepfo.

Iki gitero cyagabwe ahagana saa saba z’igicamunsi cyo kuri uyu wa 21 Ugushyingo 2025 gikurikiye ibindi bya drones bimaze iminsi bigabwa muri utu duce, bigaragara ko bigambiriye kwica abasivili b’Abanyamulenge bahahungiye.
Umutwe wa MRDP-Twirwaneho usobanura ko tariki ya 15 Ugushyingo, drone y’ingabo za RDC yagabye igitero muri Mikenke, yangize inzu z’abaturage, tariki ya 17 Ugushyingo irasa muri Rwitsankuku, ikomereza abaturage.
Visi Perezida wa MDRP-Twirwaneho ushinzwe ibikorwa bya politiki, imiyoborere na dipolomasi, Alexis Mugisha Nkurunziza, yatangaje ko ibyangirikiye mu gitero cya Sukhoi cy’uyu munsi bitaramenyekana kandi ko ahantu izi ndege ziri guturuka hataramenyekana.
Umunyapolitiki Moïse Nyarugabo yatangaje ko Sukhoi yari imaze kurasa muri Mikenke na Rwitsankuku, yanyuze mu kirere cya Minembwe, yerekeza mu cyerekezo cy’umujyi wa Kalemie mu Ntara ya Tanganyika.
Nyarugabo yagize ati: “Igikuba cyacitse mu baturage. Nyuma yo kurasa, iyi ndege yagurutse inyura hejuru ya Minembwe, yerekeza Kalemie. Amashuri arera, abanyeshuri n’ababyeyi bihishe mu bihuru mu mvura y’amahindu.”
Ku wa 20 Ugushyingo, Sukhoi ebyiri zagaragaye mu kirere cyo muri Minembwe inshuro nyinshi, bisa n’aho zari mu myiteguro yo kugaba ibitero ku batuye muri iki gice no mu bindi bihana imbibi.