Inzu ndangamurage ya Louvre iherereye mu Mujyi wa Paris mu Bufaransa kuri uyu wa Mbere, yafunzwe kubera imyigaragambyo y’abakozi, basaba ko hongerwa abakozi ndetse n’iyi nyubako igasanwa.

Itangazo ubuyobozi bw’iyi nzu bwashyize hanze rigira riti “Kubera imyigaragambyo rusange y’abakozi, Inzu ndangamurage ya Louvre irafunze uyu munsi.”

Ubu buyobozi buvuga ko ba mukerarugendo bari baraguze amatike yo kuhasura ko bazasubizwa amafaranga.

Mu kwezi gushize na bwo iyi nzu ndangamurage yafunzwe umunsi wose ndetse mu yindi minsi ikajya ifunga mu buryo budasanzwe.

Ni mu gihe hari hashize hafi amezi atatu habaye ubujura ku manywa y’ihangu bwateje impagaragara ubuyobozi bwa Louvre, kuko hibwe ibifite agaciro k’arenga miliyoni 100$.

Abajura babiri bakoze ubujura bakoresheje imodoka ifite urwego rurerure ruzamuka, binjira mu cyumba cyarimo ibintu by’agaciro, bakata umuryango w’ikirahure n’imashini maze biba ibintu umunani by’agaciro gakomeye.

Uretse ubwo bujura, ibindi bibazo bibiri biherutse kugaragazwa ni ibijyanye no kubungabunga iyi nyubako igasanwa kuko ibice byayo bishaje.

Iyi nzu ndangamurage iherereye rwagati mu Mujyi wa Paris mu Bufaransa. Yatangiye kubakwa mu kinyejana cya 12, ubwo Umwami Philippe Auguste yubakaga ikigo cy’ingabo cyo kurinda umurwa wa Paris. Nyuma y’imyaka myinshi, mu kinyejana cya 16, Abami b’u Bufaransa bayihinduyemo ingoro y’ubwami, aho abatware n’abami b’Abafaransa batuye igihe kirekire.

Mu 1793, nyuma y’ihirikwa ry’ubwami bw’u Bufaransa, Louvre yahinduwe inzu ndangamurage ishyirwamo ibihangano by’ubugeni n’inyandiko z’amateka zafatwaga nk’umutungo w’igihugu.

Uyu munsi, Louvre ni yo nzu ndangamurage isurwa cyane kurusha izindi ku Isi, aho isurwa n’abarenga miliyoni 9 buri mwaka. Irimo ibihangano bizwi ku rwego mpuzamahanga birimo La Joconde (Mona Lisa) ya Leonardo da Vinci, La Victoire de Samothrace, n’ibindi bihangano by’amateka y’ubuhanzi bw’ibihe bitandukanye.