Iran yatangaje ko yafashe icyemezo cyo gufunga umuhora wa Strait of Hormuz, umwe mu nzira zikomeye zinyurwamo na peteroli nyinshi ijya ku isoko mpuzamahanga, nyuma y’ubwiyongere bw’umwuka mubi hagati yayo na United States.

Mu itangazo ryashyizwe ahagaragara n’ingabo zidasanzwe za Iran, zizwi nka Islamic Revolutionary Guard Corps (IRGC), havugwa ko guhera ku wa 11 Kamena 2026, nta bwato bwemerewe kunyura muri uyu muhora, cyane cyane ubwikorezi bwa peteroli n’ibindi bicuruzwa. Iran yanaburiye ko ubwato bwose butazubahiriza iri tegeko bushobora kuraswa.

Ibi bije bikurikira ibitero Iran yatangiye kugaba ku birindiro by’ingabo za Amerika biri mu bihugu byo mu Burasirazuba bwo Hagati birimo Bahrain, Kuwait na Jordan. Iran ivuga ko ibi ari igisubizo ku bitero iherutse kugabwaho n’ingabo za Amerika ku butaka bwayo, birimo ahitwa Karaj ndetse no ku byambu byayo bikora ku Muhora wa Hormuz.

Ku ruhande rwa Amerika, Donald Trump yatangaje ko igihugu cye kizafata ingamba zikomeye zo gusubiza nyuma y’aho Iran ihanuye kajugujugu ya gisirikare y’Amerika yakoraga ubutumwa bwo kugenzura umutekano muri ako karere.

Umuhora wa Hormuz ufite akamaro gakomeye ku bukungu bw’isi kuko unyurwamo hafi ya 20% bya peteroli ikoreshwa ku isi. Gufungwa kwawo bishobora kugira ingaruka zikomeye ku biciro by’ibikomoka kuri peteroli no ku bindi bicuruzwa bishingiye ku bwikorezi bwo mu nyanja.

Amakuru agaragaza ko mu bihe byabanje gufungwa kw’uyu muhora, ibiciro bya peteroli byahise bizamuka cyane, bikagira ingaruka ku masoko mpuzamahanga ndetse no ku biciro by’ibindi bicuruzwa nk’ifumbire mvaruganda n’ubwikorezi bw’abantu n’ibintu.