Ubuyobozi wa santere ya Kamanyola iherereye mu Ntara ya Kivu y’Amajyepfo muri Repubulika Iharanira Demokarasi ya Congo bwatangaje ko mu ntangiriro z’Ukuboza 2025 yarashwemo ibisasu bigera ku 150 byaturutse mu Burundi.

Ubuyobozi wa Santere ya Kamanyola iherereye mu Ntara ya Kivu y’Amajyepfo muri Repubulika Iharanira Demokarasi ya Congo bwatangaje ko mu ntangiriro z’Ukuboza 2025 yarashwemo ibisasu bigera ku 150 byaturutse mu Burundi.

Kuva tariki ya 2 Ukuboza, AFC/M23 yahanganiye n’Ingabo za RDC, iz’u Burundi, Wazalendo n’umutwe w’iterabwoba wa FDLR mu bice byo muri Kivu y’Amajyepfo biherereye mu kibaya cya Rusizi.

Imbarutso y’iyi mirwano yabaye ibisasu biremereye byarashwe mu bice byo muri Teritwari ya Walungu bigenzurwa na AFC/M23, cyane cyane muri Santere ya Kamanyola na Kaziba.

Umuturage wiciwe umugore n’abana babiri yatangarije urubuga CTGL (Conspiracy Tracker Great Lakes) ko mu gihe Ingabo z’u Burundi zarasaga muri Kamanyola, babuze uko bahunga kuko nta buryo bwo kubibafashamo bari bafite.

Ati "Ntitwagize amahirwe yo guhunga kuko nta buryo twari dufite. Twasabwe kuguma mu nzu. Ni uko igisasu cyaje, kigwa ku nzu yacu. Abantu bane barapfuye. Abanjye ni umugore wanjye, abana babiri n’umuturanyi wari hano.”

Umuyobozi wa Kamanyola, Hassan Shabani, yatangaje ko kuva tariki ya 2 kugeza ku ya 4 Ukuboza, muri iyi santere hatewe ibisasu bigera ku 150 byaturutse mu Burundi, byica abaturage umunani.

Shabani yagize ati "Kuva tariki ya 2 Ukuboza, twabaye mu bihe bikomeye byo kuraswaho ibisasu byaturutse mu Burundi. Muri Santere ya Kamanyola harashwe ibisasu bigera ku 150. Ni santere ifite ubuso bwa kilometero kare zirindwi n’abaturage barenga ibihumbi 100. Amashuri yararashwe, inzu z’abasivili zararashwe, ibitaro byarashwe, abantu umunani barapfuye.”

Uyu muyobozi yagaragaje ko atumva impamvu ibisasu byaraswaga muri santere ya Kamanyola mu gihe imirwano yaberaga mu bice biri mu bilometero bigera kuri 15 birimo Lubarika na Luvungi.

Ati "Nibaza ikibazo, kubera iki imirwano yaberaga muri Luvungi na Lubarika ariko Ingabo z’u Burundi zigafata umwanzuro wo kurasa ibisasu muri Kamanyola? Hariya ubona ni ku musozi wa Vinyange, hariya ni Katoki, hariya ni mu Burundi. Bahashyize intwaro ziremereye zarashe hano muri Kamanyola. Aho hari tariki 2. Ku ya 3 n’iya 4, bakuye intwaro muri Katoki, bazimurira muri Rukana, bakomeza kurasa hano muri Kamanyola."

Umuganga mu Bitaro bya Saint-Joseph muri Kamanyola yatangaje ko ubwo Ingabo z’u Burundi zarasaga muri iyi santere, bakiriye inkomere 55, zirimo 27 zari zakomeretse cyane, zoherezwa mu Btaro bikuru bya Bukavu kugira ngo zihabwe ubuvuzi bwisumbuyeho.

Igisasu cyaguye ku nzu y’uyu mugabo cyamwiciye umugore n’abana babiri

Ibisigazwa by’ibisasu byarashwe muri Kamanyola biracyagaragara ku mihanda

Hassan Shabani yatangaje ko ibisasu 150 ari byo byarashwe muri Kamanyola