Mu gihe Uganda yitegura kwakira inama mpuzamahanga ya Africa Region Forum on Sustainable Development ya 11 Perezida Museveni kuwa Gatatu yakiriye itsinda ry’intumwa riturutse muri Komisiyo y’Ubukungu y’Umuryango w’Abibumbye ishinzwe Afurika ziyobowe na Amb. Claver Gatete.

Perezida Museveni abinyujije kuri X yagize ati: “Nakiriye intumwa ziyobowe na Bwana Claver Gatete, Umunyamabanga Nshingwabikorwa wa Komisiyo y’Ubukungu y’Umuryango w’Abibumbye ishinzwe Afurika, yansobanuriye imyiteguro y’Ihuriro rya 11 ry’Akarere ka Afurika ku Iterambere Rirambye muri Mata uyu mwaka. Nishimiye ko Uganda yatoranijwe kwakira iyi nama, kandi ntegereje kuzagirana ibiganiro bifatika n’inzobere mu bya tekinike muri Afurika ndetse n’abayobozi ba politiki. Ndabakiriye.”

Uganda igiye kwakira Ihuriro rya 11 ry’Akarere ka Afurika ku Iterambere Rirambye (ARFSD-11) kuva ku itariki ya 9 kugeza ku ya 11 Mata 2025, rizabera muri Speke Resort, Munyonyo.

Iyi nama yo mu rwego rwo hejuru, yateguwe na Komisiyo y’Umuryango w’Abibumbye ishinzwe Ubukungu muri Afurika (ECA) na Guverinoma ya Uganda, izahuza abafatanyabikorwa b’ibanze, barimo Komisiyo y’Umuryango wa Afurika Yunze Ubumwe, Banki Nyafurika ishinzwe Iterambere, n’indi miryango ishinzwe gahunda z’Umuryango w’Abibumbye.