Umunya-Kenya witwa Alex Anyoro akurikiranyweho umugambi wo gushaka kwica Hezena Lemaletian usanzwe ari Umusenateri mu Nteko Ishinga Amategeko ya Kenya.

Alex Anyoro yagejejwe mu Rukiko rwa Milimani mu murwa mukuru Nairobi kuri uyu wa Mbere, ngo aburanishwe kuri iki cyaha akurikiranyweho.

Ubushinjacyaha bwavuze ko mu bihe bitandukanye Senateri Lemaletian yagiye yakira ubutumwa kuri WhatsApp, bw’umuntu wamubwiraga ko azamwica, hakorwa iperereza birangira uyu mugabo atawe muri yombi.

Imbere y’umucamanza, Alex Anyoro yahakanye iki cyaha, avuga ko atigeze agambirira kwica uyu Musenateri cyane ko adakomoka mu gace ahagarariye mu Nteko.

Ati “Ntabwo nigeze mvuga ko nzica Senateri. Nta kintu politike yo mu gace ka Samburu imbwiye, nkurikirane gusa politike yo muri Kakamega aho nkomoka.”

Uyu mugabo yasabye kurekurwa agakurikiranwa ari hanze, ndetse umucamanza yumva ubusabe bwe, amufungura by’agateganyo ariko atanze ingwate y’Amashilingi ya Kenya ibihumbi 20.

Senateri Hezena Lemaletian yakiriye ubutumwa bumubwira ko azicwa