Perezida wa Kenya Uhuru Kenyatta yemeje ko guverinoma ya Kenya igiye gutekereza uburyo bwo guhagarika amasezerano ifitanye n’ urukiko mpuzamahanga mpanabyaha ICC.
Ibi Perezida Kenyatta yabitangaje kuri uyu wa mbere tariki 12 Ukuboza 2016.
Kenya yaba ibaye igihugu cya kane muri Afurika gifashe umwanzuro wo kwikura muri uru rukiko nyuma y’ u Burundi, Gambia na Afurika y’ Epfo.
Perezida Kenyatta yagize ati “ Ubunararibonye dufite ni uko uru rukiko(ICC) rubogama. Ibihugu bimwe byamaze (…)

Perezida wa Kenya Uhuru Kenyatta yemeje ko guverinoma ya Kenya igiye gutekereza uburyo bwo guhagarika amasezerano ifitanye n’ urukiko mpuzamahanga mpanabyaha ICC.

Ibi Perezida Kenyatta yabitangaje kuri uyu wa mbere tariki 12 Ukuboza 2016.

Kenya yaba ibaye igihugu cya kane muri Afurika gifashe umwanzuro wo kwikura muri uru rukiko nyuma y’ u Burundi, Gambia na Afurika y’ Epfo.

Perezida Kenyatta yagize ati “ Ubunararibonye dufite ni uko uru rukiko(ICC) rubogama. Ibihugu bimwe byamaze kwikuramo, ibindi biracyabitekerezaho”

Yakomeje agira ati “Twagerageje gushaka ko uru rukiko ruhindura imikorere rukubahiriza ubusungire bw’ ibihugu birugize ariko ntabwo rwigeze ruhinduka. Ubwo rero tugiye gutekereza uburyo bwo kurwikuramo”

Uretse ibihugu bitatu byo ku mugabane w’ Afurika birimo aribyo u Burundi, Gambia, na Afurika y’ epfo byamaze gutangaza ku mugaragaro ko bwafashe umwanzuro wo kuva muri ICC, igihugu cy’ Uburusiya gikora mu migabane ibiri Uburayi n’ Aziya nacyo cyamaze gufata umwanzuro wo kuva muri ICC.

Nubwo igihugu cya Gambia ubwo cyayoborwaga na Yahya Jammeh cyatangaje kumugaragaro ko kikuye muri ICC, Perezida mushya wa Gambia, Adama Barrow uherutse gutorwa yashimye imikorere y’ uru rukiko avuga ko Gambia itazarwikuramo.

Kenya na Philippine nibyo bihugu bimaze gutangaza ko birimo gutekereza uburyo bwo kwikura muri ICC ariko ntabwo birafata umeanzuro.