Minisitiri w’Ubuzima mu ntara ya Kinshasa muri Repubulika Iharanira Demokarasi ya Congo, Patricien Gongo, yatangaje indwara ya Cholera iterwa n’umwanda imaze kwica abantu 78 muri 830 bayanduye.

Ku wa 8 Nyakanga 2025, Gondo yasobanuye ko kugeza ubu, igipimo cy’abapfa mu banduye iyi ndwara kiri ku 9,4%.

Mu nama y’abaminisitiri yabaye mu cyumweru gishize, Minisitiri w’Ubuzima, Dr. Roger Kamba, yasobanuye ko mu turere tw’ubuvuzi 35 tugize i Kinshasa, 25 ari two twibasiwe n’iyi ndwara.

Ubwandu bwihuse bwa Cholera muri Kinshasa bwatewe n’imyuzure yibasiye iyi ntara mu minsi ishize, yangije ibikorwaremezo birimo imiyoboro y’amazi ndetse n’inzu zo guturamo.

Umuvugizi wa Guverinoma ya RDC, Patrick Muyaya, yasobanuye ko abibasiwe cyane ari abimuwe n’iyi myuzure bacumbikiwe mu nkambi zitandukanye.

Muyaya kandi yavuze ko ubushobozi bw’ibitaro ndetse n’aho gushyingura abicwa n’iyi ndwara buri kuba buke.