Komite y’Umuryango w’Abibumbye (Loni) ishinzwe ibihano yafatiye ibihano abantu batandatu n’umutwe wa AFC/M23, ibashinja kugira uruhare mu bikorwa bikomeje guhungabanya umutekano mu burasirazuba bwa Repubulika Iharanira Demokarasi ya Congo (RDC).

Mu bafatiwe ibihano harimo Corneille Nangaa, umuhuzabikorwa wa AFC, Colonel John Imani Nzenze wa AFC/M23, abayobozi babiri ba FDLR ari bo Général de Brigade Sébastien Uwimbabazi na Gustave Kubwayo uzwi nka Sirkoof, Muhammed Lumisa wa ADF, ndetse na Colonel Charles Sematama wa Twirwaneho.

Loni ivuga ko bamwe muri bo bagize uruhare mu bitero byibasira abasivili, gushimuta abantu, ubucuruzi butemewe bw’umutungo kamere no gushyigikira imitwe yitwaje intwaro.

Ibihano byatangajwe ku wa 16 Nyakanga birimo gufatira imitungo yabo, kubabuza ingendo mpuzamahanga no kubakumira ku bijyanye no gutunga cyangwa guhabwa intwaro. Ibi bibaye mu gihe umutekano mu burasirazuba bwa RDC ugikomeje kuzamba.