Ubuyobozi bw’Ihuriro AFC/M23 rirwanya ubutegetsi bwa Repubulika Iharanira Demokarasi ya Congo, bwatangaje ko abantu barenga 200 bapfiriye mu kirombe cy’amabuye y’agaciro cya Rubaya giherereye mu Ntara ya Kivu y’Amajyaruguru.

Umuvugizi wa Guverineri wa Kivu y’Amajyaruguru washyizweho na AFC/M23, Lumumba Kambere Muyisa, yabwiye Ibiro Ntaramakuru Reuters ko ibi byago byabaye tariki ya 28 Mutarama 2026.

Muyisa yagize ati “Abarenga 200 bazize iyi nkangu barimo abacukuzi b’amabuye y’agaciro, abana n’abacuruzi b’abagore. Bamwe batabariwe ku gihe, barakomeretse bikomeye.”

Yemeje ko mu bakomeretse, harimo abagera kuri 20 bari kuvurirwa mu bigo nderabuzima bitandukanye.

Muyisa yasobanuye ko muri ibi bihe by’imvura nyinshi, ubutaka bwo muri Rubaya bworoshye cyane ku buryo haba hari ibyago by’uko bwatenguka, bugatwara abaturage, cyane cyane abacukura amabuye y’agaciro.

AFC/M23 igenzura Rubaya kuva mu ntangiriro za Gicurasi 2024. Ni igice cy’ingenzi cyane muri Teritwari ya Masisi kuko ibirombe byaho bibitse amabuye ya Coltan agera kuri 15% by’ari ku Isi yose.