Minisitiri w’Intebe w’u Butaliyani, Giorgia Meloni, yateye utwatsi amagambo yavuzwe na Donald Trump, wavuze ko yamwinginze ngo bafatane ifoto mu nama ya G7.

Ibi byakurikiye ikiganiro Trump yagiranye na televiziyo yo mu Butaliyani ya La7, aho yavuze ko Meloni ari we wamwegereye amusaba ko bafatanya gufata ifoto, akavuga ko yemeye abitewe n’impuhwe.

Nyuma y’ayo magambo, Meloni ntiyazuyaje kuyahakanira kure, avuga ko ari inkuru yahimbwe idafite aho ihuriye n’ukuri. Yabinyujije ku mbuga nkoranyambaga ze, agaragaza ko bitari bikwiye ko umuyobozi mukuru akoresha imvugo ishobora gutesha agaciro abo bafatanyije kuyobora ibihugu.

Meloni yanagaragaje ko atari ubwa mbere Trump avuze amagambo nk’ayo ashobora kubangamira umubano w’ibihugu, ashimangira ko abayobozi bakwiye kurangwa n’icyubahiro n’ubunyangamugayo mu byo batangaza.

Aba bombi baherutse guhura mu nama ya G7 Summit yabereye mu Bufaransa, aho byari byitezwe ko ibiganiro byabo bizakomeza gushimangira umubano mwiza hagati y’ibihugu byombi. Icyakora, aya magambo ya Trump yahise ateza impaka ndende mu rwego rwa dipolomasi.

Ingaruka z’ibi ntizatinze kugaragara, kuko Minisitiri w’Ububanyi n’Amahanga w’u Butaliyani, Antonio Tajani, yahise asubika uruzinduko yari ateganyijwe kugirira muri Leta Zunze Ubumwe za Amerika mu mpera za Kamena 2026.

Ibi byose byatumye havuka ibibazo ku hazaza h’umubano hagati y’u Butaliyani na Amerika, cyane cyane mu gihe ibihugu byombi bisanzwe bifitanye imikoranire ikomeye mu bya politiki n’ubukungu.