Muri Leta ya Kaduna iherereye mu majyaruguru ashyira uburengerazuba bwa Nigeria, abantu bitwaje imbunda bishe abantu batatu, bashimuta umupadiri n’abandi benshi.

Amakuru dukesha Reuters avuga ko iki gitero cyagabwe mu gitondo cyo ku Cyumweru tariki 8 Gashyantare 2026, mu rukerera ahagana Saa 3:20.

Polisi yo muri aka gace yavuze ko abantu batatu bishwe ari abo mu nzego z’umutekano.

Ubuyobozi bwa Diyoseze Gatolika ya Kafanchan bwavuze ko umupadiri washimuswe yitwa Nathaniel Asuwaye. Yashimutanywe n’abandi bantu 10.

Leta ya Kaduna ni imwe mu zikunze kurangwamo ibikorwa by’ubugizi bwa nabi bukorerwa abakirisitu. Hari hashize iminsi mike hagarujwe abandi bakirisitu 166 bari bashimuswe n’abitwaje intwaro nyuma yo gutera urusengero rwabo.