Perezida wa Philippines, Rodrigo Duterte yatangaje ko azegeranya abayobozi barya ruswa akabashyira mu ndege yagera mu bushorishori akabahanura ndetse akaba atari ubwa mbere azaba abikoze.
Mu ijambo yavugiye ahitwa Camarines Sur mu majyaruguru ya Philippines kuri uyu wa Kabiri tariki ya 27 Ukuboza uyu mwaka, Duterte yahahamuye abari bamuteze amatwi ubwo yagarukaga ku buryo yahanuye mu ndege uwakekwagwaho ibyaha by’ubushimusi agapfa.
Ibi ngo yabikoze mu gihe yari akiri umuyobozi w’Umujyi (…)

Perezida wa Philippines, Rodrigo Duterte yatangaje ko azegeranya abayobozi barya ruswa akabashyira mu ndege yagera mu bushorishori akabahanura ndetse akaba atari ubwa mbere azaba abikoze.

Mu ijambo yavugiye ahitwa Camarines Sur mu majyaruguru ya Philippines kuri uyu wa Kabiri tariki ya 27 Ukuboza uyu mwaka, Duterte yahahamuye abari bamuteze amatwi ubwo yagarukaga ku buryo yahanuye mu ndege uwakekwagwaho ibyaha by’ubushimusi agapfa.

Ibi ngo yabikoze mu gihe yari akiri umuyobozi w’Umujyi wa Davao, nk’uko inkuru ya The Philippine Star ibivuga.

Yagize ati “ Niba urya ruswa nzagufata ngushyire muri kajugujugu nigera mu kirere nkujugunye. Narabikoze mbere, ni gute ntakongera kubikora?”

Duterte yari muri Camarines Sur nyuma yo kuzenguruka intara zayogojwe n’ibiza birimo imiyaga, imyuzure n’inkangu kuri Noheli.

Ubwo yamaraga gutangaza ibijyanye n’inkunga zigenewe abazahajwe n’ibyo biza, yagarutse ku bijyanye no kurwanya ruswa avuga ko biri mu byo ashyize imbere muri manda ye y’imyaka itandatu.

Duterte yanavuze ko ibyo kurwanya ruswa azabifatanya no guhashya abanywa ibiyobyabwenge, aho abagera ku 6000 bamaze kwicwa mu buryo buhutiyeho.
Mu ntangiriro z’uku kwezi Duterte yigambye ko ubwe yishe abantu batatu, ndetse ko n’abana be yabica mu gihe baba banywa ibiyobyabwenge.

Inshuro nyinshi abagize guverinoma ya Duterte bafata ibyo avuga nk’amashyengo cyangwa imigani nyamara ishami rya Loni rishinzwe uburenganzira bwa muntu ryategetse ko hatangira iperereza ku byaha by’ubwicanyi birimo n’ibyo yiyemereye ubwe.

Src:Igihe