Prince Harry yagiriye uruzinduko muri Ukraine rushobora kuganirirwamo ibikorwa bigamije gufasha abanya-Ukraine bakomerekeye ku rugamba.

Harry wari umaze iminsi mike asuye u Bwongereza akanabonana n’umwami Charles III, yagiye muri Ukraine akoresheje inzira ya gari ya moshi.

Ibitangazamakuru byanditse ko yatumiwe na Guverinoma ya Ukraine, ngo bavugane birambuye ku bikorwa by’umuryango we Invictus Games utegura imikino itandukanye igamije gufasha abasirikare bakomeretse, abarwaye, n’abasezerewe.

Uyu muryango yawushinze mu 2014. Yigeze gusura Ukraine muri Mata 2025 anaganira n’abamugariye ku rugamba bari mu Mujyi wa Lviv.

Ku wa 10 Nzeri 2025 ubwo yari mu Bwongereza, ibiro by’umuryango we byatangaje ko azatanga ibihumbi 500$ byo gufasha abana bo muri Gaza na Ukraine.

U Bwongereza buri mu bihugu by’i Burayi bishyigikiye Ukraine mu ntambara ihanganyemo n’u Burusiya.

Imibare yo muri Kamena 2025 igaragaza ko abasirikare ba Ukraine barenga ibihumbi 400 bakomerekeye ku rugamba mu gihe abari hagati y’ibihumbi 60 n’ibihumbi 100 baguye mu ntambara bahanganyemo n’u Burusiya.

Prince Harry yagiye muri Ukraine aho ashobora kuganira na guverinoma ku mishinga yo gufasha abasirikare bakomerekeye ku rugamba