Ingabo za Uganda zatangiye kugenzura Umujyi wa Butembo muri Repubulika Iharanira Demokarasi ya Congo, mu gihe zikomeje ibikorwa byo guhiga umutwe w’iterabwoba wa ADF.

Sponsored Ad

Zinjiye muri uyu mujyi nyuma y’ubwumvikane hagati ya guverinoma ya Uganda n’iya RDC, hagamijwe ahanini kurinda umutekano w’ibikorwa byo kubaka umuhanda wa Butembo-Beni.

Umuyobozi w’uyu mujyi, Mowa Baeki Telly Roger, yahaye ikaze ingabo za Uganda. Yasobanuye ko kujya muri Butembo ari igikorwa kigize ‘Operation Shujaa’ yo kurwanya ADF.

‘Operation Shujaa’ yatangijwe n’ingabo za Uganda mu Ugushyingo 2021. Zifatanya n’iza FARDC mu gusenya ibirindiro by’uyu mutwe muri Kivu y’Amajyaruguru na Ituri.

Meya Roger yasabye abaturage guha izi ngabo ubufasha zikeneye, ababurira ko uzagerageza kuzibangamira azafatwa nk’umwanzi w’amahoro, agezwe mu butabera.

Ingabo za Uganda zoherejwe muri Butembo mu gihe Leta ya RDC ifite impungenge ko umutwe witwaje intwaro wa M23 uri mu bice bimwe na bimwe muri teritwari ya Lubero ushobora gufata uyu mujyi.

Izi mpungenge zagaragajwe mu mpera za Kamena 2024, ubwo abarwanyi ba M23 bari bamaze gufata Kanyabayonga ifatwa nk’isangano ry’inzira ziva Butembo na Beni.