Muri Repubulika ya Demokarasi ya Congo (DRC), urubanza rwa Corneille Nangaa, umuhuzabikorwa wa Alliance River Alliance, umutwe witwaje intwaro wa politiki urimo na M23, ruri hafi kurangira mu gihe umutungo we utimukanwa n’uw’umugore we wamaze gufatirwa.

Sponsored Ad

Kuri uyu wa Mbere, itariki 29 Nyakanga, iburanisha ryibanze ku kwiregura no kuregwa. Umushinjacyaha yasabiye ibihano biremereye cyane abaregwa 26, batanu muri bo bakaba bari mu maboko y’ubutabera baburanishwa bahari.

Ku ikubitiro hari abaregwa 25, ariko uwa 26, ni Vianney Kazarama, wahoze ari umuvugizi wa M23 mu 2012, wongewe kuri urwo rutonde nyuma y’amafoto aherutse kumugaragaza ari mu duce twafashwe na M23.

Ubushinjacyaha bwasabye igihano cy’urupfu kuri benshi mu baregwa baregwa ubuhemu n’ibyaha by’intambara. Gusa Nangaa Baseane Putters, umwe mu bagize umuryango wa Corneille Nangaa, we yasabiwe imyaka 20 y’igifungo, ashinjwa kwifatanya n’umutwe urwanya ubutegetsi.

Ku rundi ruhande, ababurana indishyi basabye izingana na miliyari imwe y’amadorari y’Abanyamerika, iyi ikaba igaragaza uburemere bw’ibirego abashinjwa baregwa nk’uko iyi nkuru dukesha RFI ikomeza ivuga.

Kubw’ibyo, umutungo utimukanwa wa Corneille Nangaa n’umugore we, ndetse n’uw’uwitwa Jean-Jacques Mamba, wahoze ari umudepite akaba n’umwe mu bagize AFC, yamaze gufatirwa.

Nyuma yo gusabirwa ibihano n’ubushinjacyaha, abunganira abaregwa basabye igihe cy’iminsi itanu kugira ngo bategure igisubizo cyabo. Icyakora, Urukiko rwatanze amasaha 24 gusa, igihe gito cyane, nk’uko abanyamategeko, bagomba gutegura no kunononsora vuba vuba ingamba zabo zo kwiregura.