Iperereza ryakozwe n’Ikigo cyo mu Bwongereza gishinzwe kurinda amakuru, ryerekanye ko Urubuga nkoranyambaga rwa Reddit rwateshutse ku kurinda amakuru y’abana bo muri iki gihugu, bituma rucibwa miliyoni 14 z’Amapawundi (arenga miliyari 27 Frw).

Iki kigo cyitwa ICO (Information Commissioner’s Office) ni cyo gishinzwe kugenzura amategeko n’ishyirwa mu bikorwa ryo kurinda amakuru n’ikusanywa ryayo mu Bwongereza.

ICO iheruka gutangaza ko Reddit yo muri Amerika yagiye ikora ibirimo gukoresha amakuru y’abana mu buryo bunyuranyije n’amategeko.

Mu itangazo ICO yavuze ko uru rubuga rwateshutse ku birimo no kugenzura imyaka y’ubukure y’abarukoresha, ibishyira abana mu kaga.

Reddit ishinjwa ko itigeze ishyiraho uburyo bw’ingenzi bwo kugenzura imyaka y’abana ndetse ko nta n’icyayemereraga gukusanya amakuru y’abana bari munsi y’imyaka 13 y’ubukure.

Komiseri Ushinzwe ibijyanye n’amakuru mu Bwongereza, John Edwards, yavuze ko biteye inkeke uburyo ikigo gikomeye nka Reddit giteshuka ku mategeko arengera abana b’Abongereza.

Ati “Amakuru y’abana bari munsi y’imyaka 13 y’ubukure yarakusanyijwe ndetse akoreshwa mu buryo butumvikana nta burenganzira butanzwe. Byatumye bagera ku makuru atabagenewe. Ibi ntabwo byakwihanganirwa. Ni na byo byatumye ihanwa.”

Umuvugizi wa Reddit avuga ko ibyo ICO ibashinja atari byo kandi biteganya kujya mu nkiko kugira ngo ibirego bahawe bikurweho.

Reddit ni urubuga rukoreshwa cyane kuko abarenga miliyoni 120 bayikoresha buri munsi.