Perezida wa Repubulika ya Congo, Denis Sassou Nguesso, ateganya gutanga kandidatire kugira ngo azongere ahatane mu matora y’Umukuru w’Igihugu ateganyijwe tariki ya 22 Werurwe 2026.

Ishyaka PCT (Parti Congolais du Travail) riri ku butegetsi muri Congo-Brazaville ryafashe uyu mwanzuro ku wa 30 Ukuboza 2025 nyuma y’itora ryakozwe n’abanyamuryango baryo.

Nguesso w’imyaka 82 yatangiye kuyobora Congo mu 1979, mu 1992 asimburwa na Pascal Lissouba wamutsinze mu matora. Yasubiye ku butegetsi mu 1997 ubwo yakuragaho Lissouba binyuze muri coup d’état.

Mu 2002 no mu 2009, habaye amatora ya Perezida wa Congo, Nguesso arayegukana. Mu 2016, Itegeko Nshinga ry’iki gihugu ryaravuguruwe, hakurwaho imyaka ntarengwa y’uwemerewe guhatana, yari 70.

Nyuma y’imyaka ibiri Nguesso atsinze andi matora yabaye mu 2021, mu 2023 abatavuga rumwe n’ubutegetsi bwe barimo Jacques Joachim Yhombi-Opango barihuje kugira ngo bazamuganze mu matora ataha.

Umutekano w’amatora yo muri Congo uba wakajijwe cyane. Biteganyijwe ko habura iminsi itanu ngo amatora yo muri Werurwe 2026 abe, abasirikare bazatora kugira ngo bazashobore kubungabunga ituze.