Minisiteri y’Ingabo mu Burusiya yatangaje ko umubare w’abasirikare bandura agakoko gatera SIDA watumbagiye kuva muri Gashyantare 2022 ubwo batangiraga intambara muri Ukraine.

Amakuru y’ubwiyongere bw’ubwandu bwa SIDA mu basirikare b’u Burusiya yahishuwe n’urubuga Carnegie Politika nyuma yo gusesengura raporo ya Minisiteri y’Ingabo z’u Burusiya ku buzima bw’abasirikare bari ku rugamba.

Iyi raporo igaragaza ko mu gihembwe cya mbere cya 2022, abasirikare banduye SIDA bikubye gatanu ugereranyije n’uko byari bimeze mu gihembwe nk’icyo mu 2021. Umwaka warangiye abayanduye bikubye inshuro 13 ugereranyije n’umwaka wabanje.

Mu gihembwe cya mbere cya 2023, abasirikare b’u Burusiya banduye SIDA bikubye inshuro zirenga enye ugereranyije no mu gihembwe nk’icyo mu 2022. Umwaka wa 2023 warangiye abanduye barikubye hafi inshuro 20 ugereranyije n’uko byari bimeze mbere y’intambara.

Minisiteri y’Ingabo yagaragaje ko hari abasirikare banduye SIDA biturutse ku gukorana n’indaya imibonano mpuzabitsina idakingiye, abasaranganyije inshinge zo kwa muganga zidasukuye ndetse n’abakomerekeye ku rugamba bakanduzanya.

Mu gisirikare cy’u Burusiya, umusirikare ufite uburwayi burimo agakoko gatera SIDA ntiyemererwa kucyinjiramo, ariko ku rugamba ho biratandukanye. Ibinyamakuru bivuga ko abasirikare banduye batemererwa kuva ku rugamba.

Ishami ry’Umuryango w’Abibumbye rishinzwe kurwanya SIDA (UNAIDS) rigaragaza ko kuva mu 2022, u Burusiya buri mu bihugu bitanu bya mbere bifite abantu benshi bandura agakoko gatera iyi ndwara.

Mu bantu miliyoni 1,5 banduye agakoko gatera SIDA ku Isi mu 2022, u Burusiya bwari bufitemo 3,9%, inyuma ya Afurika y’Epfo, Mozambique, Nigeria n’u Buhinde.