Umuryango utabara imbabare wa Croix-Rouge muri Tanzania, watangaje ko mu nkambi z’impunzi z’Abarundi za Nduta na Nyarugusu, ubwandu bwa Sida bukomeje kwiyongera.

Uyu muryango watangaje ko muri izi nkambi, byibuze impunzi 36 zicwa na virusi itera sida buri mwaka, mu gihe abandura barenga 140.

Croix-Rouge yatangaje ko igituma ubu bwandu bwiyongera, ari ukubera ko nta nyigisho zihagije abari muri izi nkambi bahabwa, bigahura no kuba izi mpunzi nta dukingirizo zihabwa two kwirinda n’imiti iboneka ikaba ari mike ugereranyije n’abarwayi.

Abatuye muri izi nkambi bagaragaza kimwe mu bituma ubu bwandu bwiyongera harimo no kuba nta bugenzuzi bukwiye bukorwa, aho usanga n’abana bato bishora mu bikorwa bibi, inzego zibishizwe zikabyirengagiza zibizi.