Inteko ishinga amategeko ya Thailand yatoye Minisitiri w’intebe mushya, Paetongtarn Shinawatra, umukobwa w’umutunzi Thaskin wigeze kuyobora igihugu.

Sponsored Ad

Ku myaka 37, yabaye Minisitiri w’intebe muto mu gihugu n’umugore wa kabiri kuri uyu mwanya, nyuma ya nyirasenge Yingluck.

Itorwa rye rije nyuma y’iminsi ibiri gusa uwahoze ari Minisitiri w’intebe, Srettha Thavisin, yirukanwe n’urukiko rushinzwe kurinda itegeko nshinga.

Bombi bakomoka mu ishyaka rya Pheu Thai, ryaje ku mwanya wa kabiri mu matora yo mu 2023 ariko rishyiraho ihuriro riri ku butegetsi nk’uko iyi nkuru dukesha BBC ivuga.

Madamu Paetongtarn ahanganye n’ikibazo kitoroshye cyo kuvugurura ubukungu bwa Thailand bwahagaze no kwirinda ihirika ry’ubutegetsi rya gisirikare no kwitambika kw’inkiko zavanyeho ubuyobozi bune bwabanje buyobowe n’umuryango we.

Paetongtarn wabonye amajwi 319 ku 145 y’abatamutoye kuri uyu wa Gatanu, ni umunyamuryango wa kane mu muryango wa Shinawatra ubaye Minisitiri w’Intebe kuva mu myaka 20 ishize.