Perezida wa Leta Zunze Ubumwe za Amerika, Donald Trump yasabiye umunyamakuru wa CNN, Natasha Bertrand kwirukanwa, nyuma yo kumushinja gutangaza nabi amakuru ajyanye n’igitero iki gihugu cyagabye kuri Iran.

Natasha Bertrand asanzwe ari umunyamakuru wa CNN ukorana bya hafi na Minisiteri y’Ingabo mu gutangaza amakuru y’intambara atandukanye.

Uyu mugore ni umwe mu bakurikiraniye hafi ibitero Amerika yagabye kuri Iran, mu rukerera rwo ku wa 22 Kamena, igamije kuburizamo umugambi w’iki gihugu wo gukora intwaro za nucléaire.

Kimwe n’abandi banyamakuru benshi, Natasha Bertrand, yavuze ko nta gihambaye ibi bitero byagezeho.

Abinyujije ku rubuga nkoranyambaga rwa Truth Social, Trump yagaragaje ko atashimishijwe n’ibyatangajwe na Natasha Bertrand, amusabira kwirukanwa nk’imbwa.

Ati “Natasha Bertrand akwiriye kwirukanwa muri CNN! Naramukurikiranye mu minsi itatu atangaza amakuru y’ibihuha. Akwiriye kwirukanwa agasohorwa hanze nk’imbwa.”

Trump atangaje ibi mu gihje ibitero bya Amerika kuri Iran bikomeje kutavugwaho rumwe, ubuyobozi bw’iki gihugu buvuga ko byashegeshe Iran, mu gihe itangazamakuru rigaragaza ko nta gihambaye byangije.