Perezida wa Leta Zunze Ubumwe za Amerika, Donald Trump yashinje Barack Obama na we wigeze kuyobora iki gihugu, icyaha cy’ubugambanyi, avuga ko yagize uruhare mu kwiba amajwi mu matora.

Trump yumvikanye ashinja ubugambanyi Obama n’abandi bayobozi bakuru bakoranye, mu kiganiro yagiranye n’itangazamakuru muri White House, ku wa Kabiri tariki 22 Nyakanga 2025.

Uyu mukuru w’igihugu yavuze ko Barack Obama akwiriye gukurikiranwa na Minisiteri y’Ubutabera, kubera uruhare yagize mu kumwiba amajwi mu 2020.

Trump yagarutse kuri iyi ngingo nyuma yo kubazwa icyo atekereza kuri raporo yashyizwe hanze n’Urwego rishinzwe ubutasi muri Amerika (DNI), igaragaza ko abari mu buyobozi bwa Obama babeshyeye Trump ko akorana n’u Burusiya bifashishije inyandiko mpimbano z’ubutasi.

Trump ati “Ibi byari ubugambanyi. Barack Hussein Obama niwe muyobozi w’aka gatsiko. Hillary Clinton nawe yari ahari barakoranye, Joe Biden ndetse n’abandi barimo uwahoze ari Umuyobozi wa FBI, Comey, uwari Umuyobozi wa DNI, James Clapper, iryo tsinda ryose.”

Yakomeje avuga ko “Bagerageje kwiba amatora, barafatwa. Ariko mu 2020 bari bayibye. Kuko narinzi ko nari natsinze ayo matora ku majwi menshi, narongeye ku nshuro ya gatatu, nza gutsinda ku mubare munini w’amajwi.”

Amatora Donald Trump avuga ko yibwemo ni ayabaye mu 2020, bikarangira yegukanywe na Joe Biden. Icyo gihe Trump yashinjwe gukorana n’u Burusiya mu mugambi wo gushaka kwivanga mu matora ya Amerika.

Barack Obama ni umwe mu bari bashyigikiye cyane Joe Biden wanamubereye Visi Perezida igihe yari ku buyobozi.

Uretse kuba badahuje ishyaka, Donald Trump na Barack Obama mu bihe bitandukanye bakunze kutavuga rumwe kuri politike ya Amerika.