Perezida wa Leta Zunze Ubumwe za Amerika, Donald Trump yavuze ko Canada, Greenland na Venezuela bishobora guhinduka leta eshatu nshya z’iki gihugu.

Russia Today yanditse ko Trump yatangaje ibi ku wa Gatandatu tariki 31 Mutarama 2026, ubwo yari mu musangiro wamuhuje n’abayobozi b’ibigo bikomeye n’abandi banyepolitike. Uyu musangiro utegurwa na Alfalfa Club, ihuriro ry’abanyemari bakomeye.

Trump yavuze ko “Ntabwo kugira Greenland leta ya 51 byigeze biba mu migambi yanjye, ahubwo ndashaka kugira Canada leta ya 51, Greenland izaba leta ya 52 naho Venezuela ibe leta ya 53.”

Nyuma yo gutangaza ibi, Trump yavuze ko atari akomeje ahubwo ari amashyengo.

Trump amaze igihe kinini agaragaza ko ashaka kugenzura ikirwa cya Greenland ku mpamvu z’umutekano w’igihugu cye. Iki kirwa gisanzwe kigenzurwa na Denmark.

Ni mu gihe kandi mu bihe bitandukanye yagiye avuga ko Canada ikwiriye kwemera ikaba leta ya 51 ya Amerika.

Trump atangaje ibi kandi mu gihe yavuze ko Amerika izagira uruhare mu miyoborere ya Venezuela, nyuma yo gukura ku butegetsi Nicolas Maduro.