Amakuru atangazwa n’abanyamakuru batandukanye muri Repubulika ya Demokarasi ya Congo, aremeza ko abasirikare bakuru bo ku rwego rwa Jenerali bagera kuri bane, Colonel n’abandi basirikare bafunzwe nyuma y’iperereza rimaze amezi 6 ribakorwaho.

Abo basirikare bajyanywe muri gereza ya gisirikare ya Ndolo iri i Kinshasa, nyuma y’iperereza ryimbitse ryakozwe n’urwego rwitwa Conseil national de cyberdéfense (CNC), rwemeza ko rufite ibimenyetso bifatika.

Mu bafunzwe harimo Lt.Gen Franck Buamunda Ntumba, yahoze ashinzwe umutekano wa Perezida.

Abandi ni Maj.Gen Christian Ndaywel Okura, Brig. Gen Benjamin Katende Batubadila na Brig.Gen Antoine Longondjo Lobandji (alias Lolo).

Ubutegetsi bwa Perezida Felix Tshisekedi bwanafunze Col. Jules Boele Bagolome, Lt. Col Ada Sebakungu, Maj. Jean Lambert Embole Ngondili, n’abandi.

Hanafunzwe abasivile barimo uwitwa Jean Marcel Kabeya Mbuyi, John Safari Bigarura, n’uwitwa John Mbu-Letang.

Aba bose bakurikiranyweho ibyaha bikomeye birimo kurema umutwe w’abagizi ba nabi, umugambi wo guhirika ubutegetsi, kugerageza kwica, kugirana ubugambanyi n’igihugu gikomeye cy’amahanga, kwica amabwiriza, gutangaza ibihuha ku mbuga nkoranyambaga, gucumura kuri Perezida, gukoreshwa intwaro muri gahunda yo guhirika ubutegetsi, n’ivangura rishingiye ku moko.

Ubutegetsi bwa Perezida Felix Tshisekedi bwakunze kugenda cyane ku basirikare bakoranye na leta ya Perezida Joseph Kabila, bamwe baricwa, abandi barafungwa, abarokotse bagahunga.