Minisitiri w’Ububanyi n’Amahanga w’u Burundi, Ambasaderi Albert Shingiro, yaganiriye n’Intumwa Yihariye y’Umunyamabanga Mukuru w’Umuryango w’Abibumbye mu karere k’ibiyaga bigari, Huang Xia, ku bibazo byugarije akarere.

Sponsored Ad

Minisitiri Shingiro yasobanuye ko we na Xia banaganiriye ku masezerano yasinyiwe i Addis Abeba muri Ethiopia agamije kuzana amahoro n’umutekano muri Repubulika Iharanira Demokarasi ya Congo no muri aka karere kose muri rusange.

Yagize ati “Nishimiye kwakira Bwana Huang Xia, Intumwa Yihariye y’Umunyamabanga Mukuru wa Loni mu karere k’ibiyaga bigari. Twaganiriye ku mwuka uri mu karere no kubahiriza amasezerano ya Addis Abeba y’amahoro, umutekano n’ubufatanye bya RDC n’akarere.”

Bombi bagiranye iki kiganiro mu gihe muri RDC hari intambara ihanganishije ingabo z’iki gihugu n’umutwe witwaje intwaro wa M23. Uruhande rwa Leta rushyigikiwe n’imitwe yibumbiye mu ihuriro Wazalendo, abacancuro, ingabo z’u Burundi n’iz’umuryango wa Afurika y’amajyepfo.

Ku Burundi n’u Rwanda, umubano w’ibi bihugu warazambye kuva mu mpera z’Ukuboza 2023, ubwo Perezida Evariste Ndayishimiye yashinjaga u Rwanda gufasha umutwe witwaje intwaro wa RED Tabara, gusa rwamaganiye kure iki kirego, rusobanura ko kidafite ishingiro.

Tariki ya 20 Nyakanga 2024, Xia yaganiriye na Minisitiri w’Ububanyi n’Amahanga n’Ubutwererane w’u Rwanda, Ambasaderi Olivier Nduhungirehe, ku bibazo bibangamiye umutekano w’akarere k’ibiyaga bigari.

Nk’uko Minisiteri y’Ububanyi n’Amahanga n’Ubutwererane yabisobanuye, Xia na Ambasaderi Nduhungirehe bagaragaje ko igisubizo cya politiki ari cyo gishobora gukemura amakimbirane yo mu karere.

Yagize iti “Minisitiri Olivier Nduhungirehe yagiranye ikiganiro kuri telefone n’Intumwa Yihariye y’Umunyamabanga Mukuru wa Loni mu karere k’ibiyaga bigari, Huang Xia. Ikiganiro cyabo cyarebanaga n’umutekano mu karere n’uko amakimbirane ahari akeneye igisubizo cya politiki.”

Tariki ya 10 Ukwakira 2023, ubwo Xia yari imbere y’akanama ka Loni gashinzwe umutekano i New York, yagaragaje ko igisubizo cya dipolomasi ari cyo gishobora gutuma RDC n’akarere bitekana, bigatera imbere.

Yagize ati “Ntabwo nasoza ntagaragaje uburyo ari ngombwa ko dipolomasi ishyirwa imbere, ibiganiro bigakomeza hashakwa igisubizo gikwiye ku mahoro, umutekano n’iterambere ry’akarere k’ibiyaga bigari.”