Umutwe witwaje intwaro wa MRDP-Twirwaneho urwanya ubutegetsi bwa Repubulika Iharanira Demokarasi ya Congo, watangaje ko u Burundi bwasubije ingabo mu gace ka Bibokoboko na Point-Zéro duherereye muri teritwari ya Fizi.

Ku wa 8 Mutarama 2026, Umuvugizi wa Twirwaneho, Col Kamasa Ndakize Welcome, yatangaje ko izi ngabo ziyobowe n’abofisiye barimo uwitwa Nshimirimana, zishaka kugenzura igice cy’imisozi miremire gituwe n’Abanyamulenge.

Yagize ati “MRDP-Twirwaneho yamaganiye kure iyi gahunda mbi y’ingabo z’amahanga, igamije gusa gutera abasivili b’Abanyamulenge muri Bibokoboko na Minembwe no kubafungira inzira, ibizatuma ikibazo cyabo kiba kibi kurushaho.”

MRDP-Twirwaneho yavuze ko kuva muri Werurwe 2025, ingabo z’u Burundi zifatanyije n’iza RDC, imitwe ya Wazalendo n’umutwe w’iterabwoba wa FDLR, byishe abasivili b’Abanyamulenge, bibakorera iyicarubuzo, bamwe bibafata bunyago, bibafata ku ngufu, binasahura imitungo yabo.

Kuva mu Ukwakira 2025, imibereho y’Abanyamulenge batuye muri Minembwe yarazambye kuko ni bwo ingabo z’u Burundi n’indi mitwe bikorana, byafunze inzira zose banyuragamo bajya ku masoko no ku mavuriro.

Ibi bikorwa byatumye Abanyamulenge bagorwa no kubona ibyangombwa nkenerwa, abashoboye kubibona bakabihabwa ku giciro kiri hejuru cyane. Umubare w’abapfira mu mavuriro yo muri Minembwe, cyane cyane abana batarengeje imyaka itanu, waratumbagiye bitewe no kubura imiti.

Nyuma y’aho ihuriro AFC/M23 rifashe ibice byinshi byo mu kibaya cya Ruzizi n’umujyi wa Uvira mu ntangiriro z’Ukuboza 2025, byavuzwe ko ingabo nyinshi z’u Burundi zirimo n’izagabaga ibitero ku Banyamulenge zasubiye iwabo.

Amakuru yamenyekanye mu minsi mike ishize ni uko u Burundi bwongeye kohereza ingabo mu bice byo muri Fizi byegereye Ikiyaga cya Tanganyika birimo umujyi wa Baraka, kugira ngo zifatanye n’iza RDC mu gusubukura ibitero.

MRDP-Twirwaneho igaragaza ko ingabo z’u Burundi zoherejwe muri Bibokoboko na Point-Zéro ari izaturutse mu mujyi wa Baraka. Yatangaje ko itazarebera mu gihe umutekano w’abasivili n’umutungo wabo ukomeje kujya mu kaga.

U Burundi bumaze iminsi bugaragaza ko buri kwitegura intambara bundi bushya