Intumwa ya Perezida w’u Burusiya, Kirill Dmitriev, yavuze ko Hillary Clinton akomeje kugerageza gukoresha Ukraine kugira ngo yirinde gufungwa kubera uruhare rwe mu birego by’uko u Burusiya bwivanze mu matora ya Perezida wa Leta Zunze Ubumwe za Amerika yo mu 2016.

Ni amagambo yavuzwe mu gihe Clinton yongeye kugaragaza ko uburyo Perezida wa Amerika, Donald Trump, afata ibibazo bya Ukraine bikirimo ibibazo.

Clinton yavuze ijambo rikakaye mu nama y’umutekano yabereye i Munich mu cyumweru gishize, aho yashinjaga Trump kugira politiki idashimishije ku byerekeye Ukraine, avuga ko yirengagije ibihugu byo mu Burengerazuba kandi yirengagiza indangagaciro za kimuntu.

Clinton kandi yanahishuye ko hari gahunda yo guha Ukraine ibisasu bya Tomahawk.

Mu butumwa yashyize ku X, Kirill Dmitriev yasubije avuga ko Clinton agerageza gukoresha Ukraine nk’ikibazo kugira ngo yirinde gufungwa kubera ibinyoma by’uko u Burusiya bwaba bwarivanze mu matora.

Ibyo byagiye bivugwa bishingiye ku kuba Clinton n’uwahoze ari Perezida wa Amerika, Barack Obama bagiye bagerageza kwerekana ko ikigo cya Trump mu 2016 cyagiranye ubufatanye n’u Burusiya.

Biteganyijwe ko Hillary Clinton n’umugabo we Bill Clinton bazagirana ibiganiro na Komisiyo ya Amerika ikomeje iperereza ku byaha by’ihohoterwa bikomeje kujya hanze bifitanye isano na dosiye ya Jeffrey Epstein.

Umuyobozi w’iyo Komisiyo ishinzwe Ubutebara, Jim Jordan, yagaragaje ko Clinton azabazwa n’ibindi bibazo biterekeye Epstein gusa, harimo n’uruhare rw’ikigo cye mu gukwirakwiza ibinyoma ku byo kwivanga ku Burusiya mu matora ya Amerika.

Ni ibibazo byatangiye bishingiye ku nyandiko yiswe Steele dossier, yakoreshejwe na FBI mu kubona uruhushya rwo gukurikirana abantu bafitanye isano na Trump kandi bikavugwa ko ikigo cya Clinton cyateraga inkunga uwakoze iyo nyandiko.