Guverinoma y’u Bushinwa n’iy’u Buhinde zemeje ko zagiranye amasezerano yo gukemura amakimbirane ashingiye ku mupaka uri mu gice cy’imisozi miremire ya Himalaya.

Ingabo z’ibi bihugu zagiye zihanganira kuri uyu mupaka kuva mu mwaka wa 2020, aho buri ruhande rushinja urundi kuruvogerera ubutaka. Muri Kamena 2020, hapfiriye abasirikare 20 b’Abahinde na babiri b’Abashinwa.

Nyuma y’urupfu rw’aba basirikare, ibihugu byombi byemeranyije kwegeza inyuma ingabo zabyo zaharindaga, zijya inyuma y’urubibi rw’ibilometero 3.488 rutandukanya Himalaya.

Icyakoze mu Ukuboza 2022, ingabo z’ibihugu byombi zongeye gukozanyaho, zimwe muri zo zirakomereka. Nubwo impande zombi zashinjanye ubushotoranyi, imirwano yarahagaze, ingabo zisubira inyuma y’uru rubibi.

Minisitiri w’Ububanyi n’Amahanga w’u Buhinde, Subrahmanyam Jaishankar, kuri uyu wa 21 Ukwakira 2024 yatangaje ko ibihugu byombi byumvikanye ku buryo bizajya birinda uyu mupaka.

Minisitiri w’Ububanyi n’Amahanga w’u Bushinwa, Lin Jian, kuri uyu wa 22 Ukwakira 2024 na we yatangaje ko ibihugu byombi bimaze iminsi biganira ku kibazo kiri uyu mupaka, kandi ko byabonye igisubizo cyiza.

Yagize ati “U Bushinwa n’u Buhinde bimaze iminsi bivugana binyuze mu nzira ya dipolomasi n’iy’igisirikare ku birebana n’ikibazo cyo ku mupaka. Ubu impande zombi zageze ku gisubizo kandi u Bushinwa bubona ko ari cyiza.”

Ubu bwumvikane bwitezweho guhagarika burundu uguhangana hagati y’izi mpande bugezweho mu gihe abayobozi b’ibi bihugu bateganyaga guhurira mu Burusiya, mu nama y’umuryango BRICS, kuri uyu wa 22 Ukwakira 2024.