U Bushinwa na Leta Zunze Ubumwe za Amerika bikomeje kwitana ba mwana no kwigiza nkana ku nkomoko ya Covid-19 imaze kugaragara ku bantu 700 bayanduye ndetse abarenga miliyoni zirindwi ikabahitana

Sponsored Ad

Kuri iyi nshuro u Bushinwa bwongeye kuvuga ko Covid-19 ishobora kuba yaraturutse muri Leta Zunze Ubumwe za Amerika.

Ni mu gihe ubutegetsi bwa Perezida Trump buherutse gutangaza ko yaturutse muri laboratwari yo mu Bushinwa.

Ku wa 18 Mata 2025, Amerika yafunguye urubuga rwa internet rwerekana ko Covid-19 yaturutse muri laboratwari yo mu Bushinwa, ndetse hanengwa abarimo Joe Biden, n’uwari umujyanama we mu by’ubuzima, Anthony Fauci n’Ishami rya Loni ryita ku Buzima (OMS) ngo kuko ntacyo babikozeho.

Byaje bishimangira ibyatangajwe na CIA muri Mutarama 2025, ko icyo cyorezo gishobora kuba cyaraturutse muri laboratwari yo mu Bushinwa kurusha kuba yaraturutse ku nyamaswa.

Aya makuru yatewe utwatsi n’u Bushinwa, bwatangaje ko ibyo gukorera Covid-19 muri laboratwari, ari ibinyoma bitangazwa na Amerika.

Ku wa 30 Mata 2025, Xinhua yasohoye inyandiko igaragaza uburyo u Bushinwa bwahanganye na Covid-19, ndetse iyi nyandiko inavuga ko iki cyorezo cyaba cyaraturutse muri Amerika.

Iyi nyandiko yavuze ko Amerika yitwaza inkomoko ya Covid-19, ikayikoresha mu buryo bwa politiki.

Yakomeje ivuga kandi ko mu bushakashatsi bwakozwe ku bufatanye na OMS, bwagaragaje ko “byaba bidashoboka ko Covid-19 ituruka muri laboratwari yo mu Bushinwa”.

Iyo nyandiko ikomeza igira iti “Amerika ikwiye guhagarika kwigira nk’aho itumva cyangwa itabona, ahubwo igasubiza impungenge zikomejwe kugaragazwa n’amahanga.”

U Bushinwa buvuga ko hari ibimenyetso byerekana ko Covid-19 ishobora kuba yaragaragaye muri Amerika mbere y’uko yaduka mu Bushinwa.

Iyi nyandiko yakomeje inenga urubanza rwabereye muri Leta ya Missouri rwashinjaga u Bushinwa guhisha icyorezo. Urwo rubanza rwavuyemo icyemezo ko u Bushinwa butanga indishyi ya miliyari 24$.

Ni mu gihe Umuyobozi mu rwego rw’Ubuzima mu Bushinwa yavuze ko hagiye gukorwa ubushakashatsi ku nkomoko ya Covid-19 muri Leta Zunze Ubumwe za Amerika.