Polisi yo mu Bwongereza yatangaje ko yataye muri yombi umugabo w’imyaka 28 ukekwaho kugira uruhare mu rupfu rwa Ann Widdecombe, wahoze ari Minisitiri mu Bwongereza akaba n’umunyapolitiki wamamaye.

Uyu mugabo yatawe muri yombi nyuma yo gufatirwa mu gace South Yorkshire, aho yahise ashyirwa mu maboko ya polisi kugira ngo akorweho iperereza.

Polisi yatangaje ko ukekwaho icyaha ari Umwongereza.

Ann Widdecombe, w’imyaka 78, yasanzwe yapfuye afite ibikomere bikomeye mu rugo rwe ruherereye i Haytor, muri Devon, ku wa Kane tariki 9 Nyakanga 2026.

Abashinzwe iperereza bavuga ko bakeka ko yaba yaratewe hafi amasaha 24 mbere y’uko umurambo we uboneka.

Mbere y’uko uyu mugabo afatwa, undi mugabo w’imyaka 26 yari yatawe muri yombi i Newton Abbot, mu bilometero 18 uvuye aho Widdecombe yari atuye, akekwaho ubu bwicanyi. Gusa ku wa Gatandatu yaje kurekurwa, polisi ivuga ko atakiri mu bantu bari gukorwaho iperereza.

Nubwo abapolisi bashinzwe kurwanya iterabwoba bagize uruhare mu ntangiriro z’iperereza, polisi yavuze ko nta kimenyetso kigaragaza ko uru rupfu rufitanye isano n’ibikorwa by’iterabwoba cyangwa ko rwaba rwaratewe n’impamvu za politiki.

Abayobozi bavuze ko iperereza rikomeje kandi ko nta yandi makuru menshi azatangazwa muri iki gihe kugira ngo bitabangamira ibikorwa byo gushaka ukuri ku byabaye.

Urupfu rwa Ann Widdecombe rwateye agahinda abanyapolitiki batandukanye mu Bwongereza, barimo Minisitiri w’Intebe, Sir Keir Starmer ndetse n’umuyobozi w’Ishyaka ry’Aba-Conservateur, Kemi Badenoch, bagaragaje akababaro kandi bashima uruhare rwe mu buzima bwa politiki bw’igihugu.

Ann Widdecombe yari afite amateka maremare muri politiki y’u Bwongereza. Yabaye Umudepite uhagarariye Maidstone muri Kent kuva mu 1987 kugeza mu 2010, ndetse yanabaye Minisitiri ushinzwe umurimo, amagereza n’umutekano w’imbere mu gihugu muri guverinoma ya John Major hagati ya 1994 na 1997.

Mu mwaka wa 2019, Widdecombe yinjiye mu ishyaka rya Brexit , aho yari ahagarariye u Bwongereza bw’Amajyepfo mu Nteko Ishinga Amategeko y’Umuryango w’Ubumwe bw’u Burayi (MEP) kuva mu 2019 kugeza mu 2020. Mu 2023, yabaye umwe mu bagize Ishyaka Reform UK, aho yari Umuvugizi waryo ku bijyanye n’abimukira n’ubutabera.

Ann Widdecombe wari minisitiri bikekwa ko yishwe