Minisitiri ushinzwe ingufu muri Ukraine, Denys Shmyhal, yatangaje ko mu bihe bitandukanye u Burusiya bwagabye ibitero ku ngomero zose z’amashanyarazi mu gihugu cyabo, bituma abaturage benshi babura urumuro w’amashanyarazi n’ingufu zo gushyushya mu nzu.

Uyu muyobozi yatangaje ko ibice bifite ikibazo gikomeye cyo kubura umuriro w’amashanyarazi uhagije kubera ibitero by’u Burusiya ari umujyi wa Kyiv, Dnipropetrovsk, Kharkiv na Odesa.

Minisitiri Shmyhal yasobanuye ko inzu zibarirwa mu bihumbi zo mu bice byegereye ahari kubera urugamba nta muriro w’amashanyarazi zifite, kandi ko ubukonje bwaho bukabije mu gihe bashobora kwifashisha imashini zongera ubushyuhe.

Yagize ati "Mu mijyi imwe n’intara zimwe, imyiteguro y’ibihe by’ubukonje ntiyashobotse. Mu minsi ibiri maze mu nshingano, nabonye ko ibintu byinshi bitagenda neza.”

Umunyamabanga Mukuru wungirije w’Umuryango w’Abibumbye ushinzwe ibikorwa bya politiki no kubaka amahoro, Rosemary DiCarlo, mu ntangiriro z’iki cyumweru yatangaje ko ibitero by’u Burusiya ku bikorwaremezo bitanga ingufu biri gushyira abanyantege nke mu bihe bigoye.

Ati "Ingaruka z’ibi bitero ziri kubabaza cyane abanyantege nke; abari mu zabukuru, abana n’abantu bagorwa no gukora ingendo.”

Minisitiri Shmyhal yatangaje ko kugira ngo ikibazo cy’umuriro w’amashanyarazi muke Ukraine ifite gikemuke, ikwiye kubaka ibikorwaremezo bifite ubushobozi bwo gutunganya Gigawatt 2,7 muri uyu mwaka.

Minisitiri Denys Shmyhal yatangaje ko Ukraine ikeneye ibikorwaremezo bifite ubushobozi bwo gutunganya Gigawatt 2,7 bitarenze uyu mwaka