Mu mwaka wa 2016, mu matora y’ibanze y’Ishyaka ry’Abarepubulikani (Republican Party) muri Leta Zunze Ubumwe za Amerika, habaye ihangana rikomeye hagati ya Marco Rubio na Donald Trump. Icyo gihe bombi bahataniraga kuzahagararira ishyaka ryabo mu matora y’umukuru w’igihugu.

Nta muntu wari waratekereje ko ubunini bw’ibiganza bya Donald Trump cyangwa se amagambo asesereza ku miterere ye bizaba imwe mu ngingo zizavugwaho cyane mu kwiyamamaza kwa Perezida wa Leta Zunze Ubumwe za Amerika. Icyakora, ni ko byagenze ubwo Marco Rubio, wari Senateri wa Florida mu 2016, yatangizaga ibitero bikomeye kuri Trump bari bahanganye mu matora y’ibanze y’ishyaka ry’Abarepubulikani.

Rubio yatunguye benshi ubwo yavugaga ko Trump afite “ibiganza bito,” anatanga ibimenyetso byashakaga kwerekana ko ibyo bishobora kuba bifitanye isano n’ibindi bice by’umubiri we. Ibyo byatumye impaka za politiki ziva ku ngingo zirebana n’imiyoborere n’ubukungu, zijya ku magambo asebanya no kwibasira imiterere y’umuntu.

Abasesenguzi benshi banenze Rubio bavuga ko yari amaze gutesha agaciro urwego rw’impaka za politiki muri Amerika. Gusa we yaje kwisobanura mu kiganiro yagiranye na Steve Inskeep wa NPR, ahakana ko yari yatangiye kwitwara nka Trump nk’uko bamwe babimushinjaga.

Icyakora, ibyo ntibyahagaritse urwo rugamba rw’amagambo. Rubio yakomeje gusubiza Trump wari waratangiye kumwita “Little Rubio,” ashimangira ko nubwo Trump amurusha uburebure, afite ibiganza bito bidahuye n’indeshyo ye. Mu ijambo rye ryakurikiwe n’ibitwenge byinshi by’abari aho, Rubio yagize ati: “Muzi ibyo bavuga ku bagabo bafite intoki ngufi.”

Aya magambo yateye imbaga ibitwenge n’amashyi menshi, mu gihe Trump wari mu kiganiro mpaka yasaga n’ukozwe n’isoni. Rubio yongeye kubikomozaho avuga ati: “Ntimwabizera.” Ibintu byatumye abari aho barushaho kwishima.

Uretse ibyo bitebya, Rubio yanakomeje kwibasira Trump ku buryo yabonaga adafite ubushobozi bwo kugeza Amerika ku ntego yiyemeje. Yagize ati: “Donald Trump ntabwo azongera kugira Amerika igihangange; ahubwo azayigira orange,” yerekeza ku ibara ry’uruhu rwa Trump ryakundaga kuvugwaho cyane.

Mu minsi yakurikiyeho, Rubio yarushijeho gukaza umurego. Yise Trump “umutekamutwe” ushaka gukorera Abanyamerika uburiganya bukomeye mu mateka ya politiki y’icyo gihugu. Yakomeje kandi kumunenga ku kuba adafite gahunda za politiki zisobanutse no ku masezerano menshi yasezeranyije abaturage ariko atarubahirije.

Rubio yanageze aho anenga imiterere ya Trump, avuga ko uruhu rwe rwahindukaga ibara ku buryo uwamukoreye ayo mavuta cyangwa ibindi byongeraga ibara ku ruhu yagakwiye kubiryozwa. Nyuma y’ikiganiro mpaka cyabereye muri Texas, yanabwiye imbaga i Dallas ko Trump yari “ari gushonga” kubera ubushyuhe n’igitutu cy’ibibazo yabazwaga, ndetse asebya ko ashobora kuba yari akeneye kureba niba imyenda ye itari yatose.

Uko baje gukorana nyuma

Nubwo mu 2016 bari abanzi ba politiki, ibintu byatangiye guhinduka nyuma y’intsinzi ya Trump mu matora rusange. Rubio yakomeje gukora muri Sena ya Amerika, maze uko imyaka yagiye ishira agenda arushaho kwegera gahunda za Trump mu ishyaka ry’Abarepubulikani.

Mu gihe Trump yagarukaga ku butegetsi mu 2025, yahisemo Rubio kugira ngo abe Secretary of State, umwe mu myanya ikomeye cyane muri guverinoma ya Amerika ushinzwe ububanyi n’amahanga. Ibi byatangaje benshi bibuka amagambo akarishye bateranaga mu 2016.

Kugeza ubu, Rubio ni umwe mu bantu ba hafi ba Trump mu by’ububanyi n’amahanga, ndetse yahawe n’izindi nshingano zikomeye mu buyobozi bwe. Abasesenguzi benshi babona uru rugendo nk’urugero rw’uko muri politiki ihangana rikomeye rishobora kuvamo ubufatanye iyo inyungu za politiki zihuye.

Mu magambo make, Marco Rubio na Donald Trump bavuye ku kuba ba mukeba bakomeye mu matora ya 2016, bahinduka abafatanyabikorwa ba hafi mu buyobozi bwa Trump, ibintu bigaragaza uburyo politiki ishobora guhinduka vuba bitewe n’ibihe n’inyungu z’abayikora.