Umwiryane wavutse hagati y’ubuyobozi bukuru bw’ihuriro ry’imitwe ya Wazalendo ishyigikiwe n’ubutegetsi bwa Repubulika Iharanira Demokarasi ya Congo, n’ubuyobozi bw’igisirikare cy’iki gihugu.

Umuvugizi w’imitwe ya Wazalendo, Habyarimana Mbitsemunda uzwi nka Jules Mulumba, yagaragaje ko mu gisirikare cya RDC harimo akagambane gakomeye kagize ingaruka no ku myitwarire ku rugamba.

Mulumba yatangaje ko gufungwa k’Umuyobozi wungirije w’Inkeragutabara za RDC, Gen Maj Janvier Mayanga wa Gishuba, kwaturutse ku kagambane yagiriwe n’Umuyobozi Mukuru w’uyu mutwe, Lt Gen Padiri Bulenda.

Yavuze ko Gen Mayanga yafunzwe azira kutemeranya n’abanyereje miliyoni 8 z’Amadolari yagenewe Wazalendo, aturutse muri Minisiteri y’Ingabo n’iy’Imari.

Wazalendo yashinje Lt Gen Padiri ko ari we uri inyuma y’ubutumwa butandukanye bumaze igihe buvuga nabi iyi mitwe yitwaje intwaro imenyereweho ibikorwa by’ubugizi bwa nabi.

Mulumba yashinje Gen Fall Sikabwe uruhare rukomeye mu gutuma abarwanyi ba AFC/M23 bafata umujyi wa Goma tariki ya 27 Mutarama 2025, kuko ngo ‘yaremaje’ ibikorwa bihuriweho by’ingabo z’umuryango wa Afurika y’amajyepfo, iz’u Burundi na Wazalendo.

Yageretse ugutsindwa kw’ingabo za RDC na Wazalendo ku bandi bofisiye bakuru mu gisirikare cya RDC barimo Lt Gen Masunzu Pacifique na Brig Gen Olivier Gasita bakomoka mu ntara ya Kivu y’Amajyepfo, agaragaza ko atumva impamvu bo bacyidegembya.

I Kinshasa hafungiwe abofisiye bakuru benshi barimo Gen Dieudonne Mutupeke Kiamata, Gen Marcel Mbangu Mashita, Gen Franck Ntumba wari ushinzwe igisirikare mu ngoro y’Umukuru w’Igihugu na Gen Christian Tshiwewe Songesha wabaye Umugaba Mukuru w’Ingabo, bose bashinjwa gushaka kugirira nabi Perezida Félix Tshisekedi.

Wazalendo ihamya ko Gen Ntumba na Tshiwewe ari bo bateguye umugambi wo gushaka gukuraho ubutegetsi bwa Tshisekedi, naho ngo Mutupeke na Mbangu bo barazira icyaha batakoze.

Lt Gen Padiri Bulenda uyobora Inkeragutabara zibarizwamo na Wazalendo ashinjwa kunyereza amafaranga