Mu 2025, uruganda rwa Chery rwagurishije imodoka zo mu cyiciro cya SUV zigera kuri 2.315.275, bituma ruba urwa mbere ruyoboye izindi z’Abashinwa mu kugurisha imodoka nyinshi zo muri iki cyiciro ku Isi.

By’umwihariko, imodoka za Chery Tiggo 7 zikoresha lisansi ni zo zagurishijwe cyane hanze y’u Bushinwa, biba umwaka wa kane wikurikiranya.

Kuva zatangira gukorwa, izingana na 1.000.000 zimaze kugurishwa mu gihugu 100.

Muri rusange uru ruganda rwagurishije imodoka zingana na 2.806.393 zirimo 1.344.020 zagurishijwe hanze y’u Bushinwa, zose hamwe zikaba zirimo 903.847 z’amashanyarazi.

Muri rusange Chery imaze kugurisha imodoka zingana na miliyoni 5,8 hanze y’u Bushinwa. Imwe mu modoka eshanu zihava iba ari iy’uruganda rwa Chery.

Zimwe muri izi modoka ziza mu Rwanda kuko niba ugenda muri Kigali, buri kanya usigaye ubona imodoka nyinshi zitwa iCar. Izi na zo zikorwa n’uru ruganda.

Iziboneka cyane ni iza iCar 03 z’amashanyarazi. Na zo zibarirwa mu cyiciro cy’inini zizwi nka ‘SUV’. Yamuritswe bwa mbere ku mugaragaro mu imurikagurisha ry’imodoka rya Chengdu Motor Show mu 2023. Iboneka mu byiciro bitandukanye, igiciro cy’ibanze ni 15.250 $ [21.223.361 Frw].

Izindi modoka ziboneka mu Rwanda zikorwa n’uru ruganda zirimo iza Jetour.

Si ibyo gusa kuko muri Mata 2025, uru ruganda rwinjiye mu mikoranire n’u Rwanda.

Chery International yashinzwe mu 1997. Kugeza ubu ikorera mu bihugu birenga 100 ndetse ikaba ikomeje gushaka uko yarushaho kwagukira hirya no hino.

Chery International ikora amoko y’imodoka zitandukanye harimo izijya ku isoko zitwa Chery, zirimo amoko nka Tiggo 7, Tiggo 8, Arrizo 5.

Uru ruganda kandi rukora imodoka zizwi ku mazina ya Jetour, Exeed, Kaiyi, iCar, Jaecoo, Luxeed na Soueast.

Uretse imodoka uru ruganda rwikorera, runafitanye imikoranire n’uruganda rwa Jaguar Land Rover rwo mu Bwongereza, ari narwo rukora imodoka za Range Rover na Jaguar.